Адлия вазирлиги матбуот котиби Севара Ўринбоева муҳокамаларга сабаб бўлаётган «қўшфамилиялилик» тушунчасига ўз каналида изоҳ бериб ўтди.

Ижтимоий тармоқларда қизғин муҳокамага сабаб бўлаётган «қўшфамилиялилик» тушунчасига аниқлик киритиб ўтсак. Аввало, бу тушунча бугун  ҳамма жар солаётганидек «қайноқ» янгилик эмас.

Эринмасангиз ушбу манзил орқали Ўзбекистон Республикаси Вазирлар Маҳкамасининг 2016 йил 14 ноябрдаги 387-сон «Фуқаролик ҳолати далолатномаларини қайд этиш қоидаларини тасдиқлаш тўғрисида»ги Қарорининг 90-банди иккинчи хатбошиси билан танишиб чиқинг.

Унда шундай ёзилган:

«Никоҳ тузилганлигини қайд этишда никоҳланувчи шахслар ўз хоҳишларига кўра иккаласидан бирининг фамилиясини умумий фамилия сифатида танлашлари ёки ўзларининг никоҳгача бўлган фамилияларида қолишлари мумкин.

Никоҳланувчилар фамилияларининг қўшилиши орқали ҳосил бўлган фамилия умумий фамилия сифатида танланиши мумкин».

Бу тартиб ихтиёрийликка асосланган бўлиб, фуқароларнинг эркин танлови асосида амалга оширилади. Қонунчиликка киритилган янги ўзгаритишга кўра, фамилияларининг қўшилиши орқали ҳосил бўлган фамилия нима эканлигига аниқлик киритилган, холос.