Андроид қурилмалар учун Xabar.uz мобил иловаси. Юклаб олиш ×

Суд — шоу эмас! Депутат суд онлайн ёритилишига қарши чиқди

Суд — шоу эмас! Депутат суд онлайн ёритилишига қарши чиқди

Украина президенти Зеленскийни сайловдан четлатиш бўйича суд жараёнидан тўғридан-тўғри трансляция

Фото: АнтиКор

Олий Мажлис Қонунчилик палатаси депутати Акмал Раҳмонов суд жараёнини тўғридан-тўғри трансляция қилишга қарши эканини билдирган.

«Суд жараёни — шоу эмас! Инсон тақдири ҳал бўладиган, унинг жамиятдаги ўрнини бор ёки йўқ қилиши мумкин бўлган мураккаб ҳодиса», деб ёзган депутат.

Раҳмонов парламент қуйи палатасига киритилган суд мажлисини радио, телевидение ва интернет орқали онлайн, тўғридан-тўғри трансляция қилишга қонуний рухсат беришни назарда тутадиган қонун лойиҳаси ҳақида фикр билдирган.

Депутат ўз фикрини билдирар экан, бир қатор саволларни қўйган:

  • Бу ўзи қанчалик тўғри?
  • Суд жараёни тўғридан-тўғри оммага ҳавола қилинса, тарафларнинг дарди дастурхон этилса, шаън, қадр-қиммат, конституциявий ҳуқуқ ҳисобланмиш дахлсизлик деган нарсалар, қолаверса, холислик қандай таъминланади?
  • Миллий қадриятларимизга путур етказмайдими?
  • Фарзандларимиз руҳиятига зиёни қанчалик?
  • Ҳали бунга фурсат эрта эмасми?
  • Айни масалада хорижда қандай йўл тутилган?
  • Самараси ва натижаси қанчалик, оқибати салбий эмасми?

«Халқ вакиллари — депутатларни ўйлантираётган бу каби саволлар ҳозирча жавобсиз, очиқ қолмоқда...», деб ёзғиради халқ вакили.

Депутатнинг иддаосича, бундай тажриба бирор-бир мамлакатда йўқ. У шу орқали судьяларнинг шахсини ҳам хавф остига қўйишдан хавфсираган. Натижада депутат қонун ижодкорлари ва мутахассислардан қатор саволларга жўяли жавоб ололмаганини айтган.

«Масалан, “суд мажлисини тарафларнинг мулоҳазаларини инобатга олган ҳолда, онлайн трансляция қилишга фақат суд мажлисида раислик қилаётган судьянинг рухсати билан йўл қўйилади”, деган норма нимани англатади? Розилик деганими ёки бошқа нарсами? Ҳатто, жиноятларнинг тоифалари ҳам аниқ ажратилмаган. Ўта субъективликнинг ўчоғига айланиши мумкин», деган халқ вакили.

Маълумот учун, ҳозиргача суд жараёнларини онлайн ёритиш уёқда турсин, ўзбек журналистлари бемалол қатнашиши таъминланмаган. Ахборот ва оммавий коммуникациялар агентлигига айнан шу масала вазифа қилиб топширилганди.

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг