Айрим сиёсатшунослар муддатдан аввал ўтказиладиган парламент сайловларидан кейин Украина парламенти ҳар хил «юлдузлар» билан тўлиб кетишидан хавотир билдиришяпти. Масалан, украиналик сиёсий эксперт Юрий Гавриленконинг фикрича,  шу кетишда Олий Рада Олий эстРадага айланиб қолиши ҳеч гап эмас.

Экспертнинг фикрича, ҳар хил шоуменлар, антрепренерлар, қўшиқчилар, спортчилар ва ҳоказо «янги ва ёш шахслар» йиғилавериши оқибатида иқтисодиётни тушунадиган кишиларни топиш амримаҳол бўлиб қолиши мумкин.

«Пенсия жамғармаси бюджетини тўлдиришни ким ўйлайди, тарифларни-чи? Рада 70-80 фоизга янгиланишини, аммо сифати пасайишини ҳозирданоқ тахмин қилиш қийинмас. Буни 5-чақириқдан бери кузатиб келяпмиз », — деди Гавриленко.

Эслатиб ўтамиз, Украина Конституцион суди президент Владимир Зеленскийнинг 8-чақириқ Олий раданинг ваколатларини тўхтатиш қарори конституцияга зид эмаслиги ҳақида баёнот берган. Яъники муддатдан аввал парламентга сайловлар ўтказиш — қонуний, бу тадбирлар 21 июлга мўлжалланган.