Молдова парламенти бугун, 9 июль куни ўтказилаётган махсус йиғилишида мамлакат бош прокурори Эдуард Харунжен фаолиятига баҳо беради. Бу ҳақда «EADaily» ёзмоқда.

Депутатлар бир тўхтамга келиб олишганидан сўнг мамлакат президенти Игорь Додон бош прокурорга «чиқиш» эшикларини кўрсатиб қўйиши кутилмоқда.

Шу нашр хабар беришича, ўтган ҳафта бошида Модова раҳбари Харунженга шарт қўйганди: «Ё ўзинг кетасан ёки кетказамиз».

Майя Санду (ҳукумат раҳбари) ҳам бу масалада президент билан якдил бўлиб, бош прокурорни Демократик партия режими манфаатлари йўлида қонунбузарлик билан  шуғулланишда айблаган.

Эдуард Харунженнинг эса кетгиси йўқ: «Доим қонун доирасида ишлаганман, ўз ихтиёрим билан кетишим шарт эмас».

Социалистлар партияси фракциясидан парламентарий Владимир Цурканнинг таъкидлашича, прокуратура тўғрисидаги қонунда «томонларнинг ихтиёри билан боғлиқ бўлмаган ҳолатлар бўйича» хизмат ваколатларини тўхтатишга рухсат этилади.

«Бунақа ҳолатлардан бир нечтасини санаш мумкин, айнан олганда — агар тайинланиш пайтида бу шахс танлов талабига мос келмаса. Харунжен охирги 6 ой Прокурорлар олий кенгаши аъзоси бўлмаган. Бу вазиятга ойдинлик киритишга уриниб кўришди, бироқ эгаллаб олинган давлат шароитида мантиқий якунига етмай қолган», — деди Цуркан.

Молдова ички ишлар вазири, бош вазир ўринбосари Андрей Нэстасе Эдуард Харунжен даври прокуратурасини «ўзига хос Европа Шимолий Кореясига айланган авторитаризмнинг сўнгги таянчи», деди.

«Мен жаноб, агар шундай дейиш ўринли бўлса, Эдуард Харунжендан у ва қочиб кетган хўжайинлари қонунлар ва инсон ҳуқуқларини беҳурмат қилиб, содир этган жиноятлари ҳақидаги ҳақиқатларни аниқлаш йўлини тўсмасликни такроран сўрайман. Жаноб Харунжен, фуқаролар сиз каби инсонлар қаршисида қалтираб турган замонлар ўтиб кетган!» — деди Нэстасе.