Tinch okeanining ekvatorial zonasida suv haroratining pasayishi bilan bog‘liq La-Ninya tabiiy hodisasi yaqin oylarda yana shakllanishi mumkin, deb ma’lumot berdi Rossiya gidrometeorologiya markazi ilmiy rahbari Roman Vilfand.

Meteorologning aytishicha, hozir neytral faza saqlanib turibdi — na La-Ninya, na El-Ninoning yaqqol belgilari yo‘q. «Yana kichik La-Ninya davri kuzatilishi mumkin, uning yaqin bir-ikki oy ichida qaytishi ehtimoli yo‘q emas», — dedi mutaxassis.

Ma’lumot uchun: La-Ninya (ispanchadan tarjima qilinganda — «qiz bola»), El-Nino («o‘g‘il bola») — butun dunyo bo‘ylab harorat va yog‘ingarchilikka ta’sir qiluvchi qarama-qarshi iqlim fazalaridir. La-Ninyada issiqlik atmosferadan okeanga faol o‘tib, suv harorati pasayadi va dunyo bo‘ylab havo haroratining umumiy pasayishiga olib keladi, El-Ninoda esa aksincha, okean suvi isib, global haroratning ko‘tarilishiga sabab bo‘ladi.

So‘nggi El-Nino 2023-yil mayidan 2024-yil apreligacha davom etib, keyin neytral holatga o‘tgan. Biroq uning oqibatlari davomli bo‘ldi — 2024-yil butun kuzatuvlar tarixiga eng issiq yil sifatida kirib, 2023-yilgi jazirama rekordlari yangilandi. La-Ninya esa 2025-yil boshida taxminan uch oy davom etdi, bu qisqa davr haroratga uncha ta’sir qilmadi, aksariyat mintaqalarda yuqori haroratlar saqlanib qoldi.