Tarmoqda «Maktab ilonlar maskaniga aylangandimi?» sarlavhasi ostidagi videolavha tarqaldi.

Ushbu holat yuzasidan Toshkent shahar Maktabgacha va maktab ta’limi boshqarmasi izoh berdi.

Joriy yilning 10 may kuni soat 12:30 atrofida ushbu maktabning 6-sinf o‘quvchisi O‘.A.ni maktab binosining ikkinchi qavati deraza rom qismining tirqishidan ilon (dala suv iloni) tishlab olgan. O‘quvchiga shu vaqtning o‘zida birinchi tez tibbiy yordam ko‘rsatilib, ota-onasi va sinf rahbari hamrohligida Toshkent shahridagi 16-sonli shifoxonaga olib borilgan. U yerda o‘quvchi O‘.A. to‘liq tibbiy tekshiruvdan o‘tkazilib, jiddiy jarohat olmaganligi aniqlanib, shu kunning o‘zida o‘quvchi maktabdagi dars jarayonlarida qatnashgan.

Ma’lumot o‘rnida, 348-sonli maktab binosida 2008 yildan buyon ta’mirlash ishlari olib borilmagan bo‘lib, 2023 yilning mart-aprel oylarida «Tashabbusli budjet» loyihasi asosida maktabning tom qismida mukammal ta’mirlash ishlari olib borildi.

Maktab, davlat Dasturiga ko‘ra, 2024 yilda to‘liq mukammal ta’mirlanishi ko‘zda tutilgan.