Buyuk ozarbayjon shoiri kulliyoti o‘zbek tilida nashr etildi
![Buyuk ozarbayjon shoiri kulliyoti o‘zbek tilida nashr etildi](http://static.xabar.uz/crop/3/5/720_460_95_3528138484.jpg)
Buyuk ozarbayjon shoiri Muhammad Fuzuliyning ikki jildli «Kulliyot»i o‘zbek tilida chop etildi. To‘plam shoir tavalludining 530 yilligi munosabati bilan O‘zbekistondagi Haydar Aliyev nomidagi Ozarbayjon madaniyat markazi loyihasi doirasida nashr qilindi.
Fuzuliyning ikki jildli asarlari O‘zbekistonda ilk marotaba 1959 yilda dunyo yuzini ko‘rgan. Keyingi davrlarda shoirning asarlari turli mualliflar tomonidan nashrga tayyorlangan bo‘lsa-da, uning ijodini to‘liq qamrab ololmagan. Yangi «Kulliyot» mutafakkir asarlarini keng tarzda qamrab olishi bilan ahamiyatlidir.
«Kulliyot»da Fuzuliyning turli davrlarda o‘zbek tilida chop etilgan asarlari, shu bilan birga, uning ozarbayjon tilidagi asarlari, «Devon»i qo‘lyozma nusxalaridan foydalanilgan holda, avvalgi nashrlarda yo‘l qo‘yilgan xatolar tuzatilgan, sharhlar va kichik lug‘at ilova qilingan.
Filologiya fanlari bo‘yicha falsafa doktori Karimulla Mammadzoda nashrga tayyorlagan to‘plamga Ozarbayjon Milliy fanlar akademiyasi akademigi Isa Habibbeyli va O‘zbekiston Fanlar akademiyasi akademigi Shuhrat Sirojiddinov ilmiy muharrirlik qilgan.
Ozarbayjon madaniyat markazi ushbu nashr mamlakatimizning yetakchi oliy ta’lim muassasalari va kutubxonalariga tuhfa qilinishini bildirgan.
Shoir va mutafakkir Muhammad Fuzuliy ozarbayjon, fors va arab tillarida ijod qilgan. Buyuk shoirdan «Devon», «Layli va Majnun», «Matla’ ul-e’tiqod», «Hadiqat us-suado», «Suhbat ul-asmor», «Shikoyatnoma», «Bangu boda» «Anis ul-qalb», «Yetti jom», «Rindu Zohid», «Sihhat va Maraz» kabi nazmiy, nasriy, falsafiy-didaktik asarlar meros qolgan. Badiiy yuksak asarlari bilan ozarbayjon adabiyotini yangi bosqichga ko‘targan Fuzuliy o‘zidan keyingi turkiyzabon shoirlarga ham kuchli ta’sir ko‘rsatgan.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter