Hukumatning 2022-yil 28-sentyabrdagi «Auditorlik tashkilotining ishi sifatini tashqi nazoratdan o‘tkazish tartibi to‘g‘risidagi nizomni tasdiqlash haqida»gi qarori bilan auditorlarning ish sifatini tekshirish tartibi belgilandi. Bu haqda «Norma» nashri ma’lum qildi.

Nizomga muvofiq: 

• tashqi nazorat moliya vazirining buyrug‘i asosida Moliya vazirligi tomonidn 10 kundan ko‘p bo‘lmagan muddatda o‘tkaziladi;
• tashqi nazoratni amalga oshirishda auditorlarning respublika jamoat birlashmalari vakillari jalb qilinadi;
• tashqi nazorat oxirgi ikki moliyaviy hisobot davrida majburiy auditorlik tekshiruvini o‘tkazgan auditorlik tashkilotlariga nisbatan o‘tkaziladi;
• tijorat banklarini majburiy auditorlik tekshiruvdan o‘tkazgan auditorlik tashkilotlari Markaziy bank bilan birgalikda tashqi nazoratdan o‘tkaziladi;
• tashqi nazorat ob’yekti auditorlik tashkilotining auditorlik xizmati ko‘rsatishdagi faoliyati hisoblanadi, shu bilan birga tashkilotning moliyaviy-xo‘jalik faoliyatiga aralashishga yo‘l qo‘yilmaydi;
• auditorlik tashkiloti tomonidan kerakli ma’lumotlarni taqdim etmaslik uni auditorlik tashkilotlari reyestridan chiqarishga asos bo‘ladi;

Ma’lumot uchun: auditorlik tashkiloti Auditorlik tashkilotlarining reyestridan chiqarilgan taqdirda, auditorlik faoliyatini amalga oshirishga va firma nomida «auditorlik tashkiloti» degan so‘z birikmasidan foydalanishga yo‘l qo‘yilmaydi.

• tashqi nazorat o‘tkazilganda tekshiruvchilar «tekshirishlarni ro‘yxatga olish» kitobini to‘ldirishlari lozim;
• tekshirish natijasi bo‘yicha auditorlik tashkilotiga 30 kun muddat ichida kamchiliklarni to‘g‘irlash haqida xabarnoma beriladi;
• auditorlik faoliyatidan boshqa faoliyat bilan shug‘ullanganlik, auditorlik tekshiruvida o‘rnatilgan cheklovlarga rioya etmaganlik va soxta auditorlik xulosalari taqdim etilganligi aniqlanganda Moliya vazirligi sudga murojaat etishga haqli;
• tashqi nazorat natijalari va ko‘rilgan choralar Moliya vazirligi saytida e’lon qilinadi.