Bahorning ilk kunlarida Toshkent shahrida O‘zbekiston Milliy tadqiqot universiteti tomonidan «Ayollarning fandagi o‘rni mavzusida muloqot» xalqaro anjumani bo‘lib o‘tmoqda. YuNESKOning Almati shahridagi vakolatxonasi, Rivojlanayotgan mamlakatlar uchun ilm-fan sohasida ayollar tashkiloti (OWSD), O‘zbekiston Respublikasining YuNESKO ishlari bo‘yicha Milliy komissiyasi hamda Birlashgan Millatlar Tashkiloti Oziq-ovqat va qishloq xo‘jaligi tashkilotining (FAO) O‘zbekiston Respublikasidagi Vakolatxonasi bilan hamkorlikda o‘tkazilayotgan ushbu anjumanning asosiy maqsadi ilm-fan, texnologiya va innovatsiyalarda gender tengligiga qanday erishish mumkinligi bo‘yicha tajriba almashish.

Ma’lumot uchun: bugungi kunda respublikamizda fan doktorlarining soni 700 dan ortiq, fan sohasida izlanish olib borayotgan ayollar soni 5 mingdan ziyod, oliy ta’lim yurtlarida dars berayotgan xotin-qizlar soni 14 mingdan oshadi.   

Anjuman doirasida 2019 yildan boshlab Birlashgan Millatlar Tashkiloti Oziq-ovqat va qishloq xo‘jaligi tashkiloti O‘zbekiston Respublikasi Vakolatxonasining tashabbusi bilan «O‘zbekiston tog‘ va vodiy o‘rmonlarini barqaror boshqarish» FAO/GEF loyihasi bo‘yicha gender tengligi strategiyasi ishlab chiqilib, bugungi kunda samarali amalga oshirilayotganiga urg‘u berib o‘tildi.