Bishkek shahrida Turkiy davlatlar tashkiloti Davlat rahbarlari kengashining navbatdagi majlisi boshlandi. Unda tashkilotga a’zo davlatlar rahbarlari, jumladan O‘zbekiston Prezidenti Shavkat Mirziyoyev ham ishtirok etdi va nutq so‘zladi.

O‘zbekiston yetakchisi o‘z nutqi avvalida tashkilotning navbatdagi sammitini yuksak darajada tashkil etgani va ko‘rsatilayotgan an’anaviy mehmondo‘stlik uchun Qirg‘iz Respublikasi Prezidenti Sadir Japarovga minnatdorlik izhor etishdan boshladi.

Shuningdek, Mirziyoyev Qirg‘izistonning TDTda iqtisodiy integratsiya, umumiy taraqqiyot, raqamli kelajak va xavfsizlik yo‘nalishlarida sheriklikni asosiy maqsad etib belgilagan raisligi davri muvaffaqiyatli o‘tishini tiladi va Qozog‘iston tomonini tuzilmada o‘tgan samarali raisligi bilan tabrikladi.

«Ming afsuski, Ostona va Shusha shaharlaridagi uchrashuvlarimizdan keyingi vaqt mobaynida global geosiyosiy jarayonlar tobora murakkab tus oldi. Yetakchi davlatlar o‘rtasidagi raqobat va ishonchsizlik muhiti keskin kuchaymoqda, ziddiyat va urush o‘choqlari ko‘payib, turli xavf-xatarlar yanada ortmoqda.

Albatta, bularning salbiy ta’siri va oqibatlarini davlatlarimiz har tomonlama sezib turibdi. Bu muammolar savdo, investitsiya, transport, energetika, qishloq xo‘jaligi va boshqa sohalardagi qo‘shma reja va katta loyihalarimizga jiddiy to‘siq bo‘lmoqda, desam, bu – ayni haqiqatdir.

Tashkilotimiz doirasida siyosiy va xavfsizlik masalalarida muloqotlarni tizimli davom ettirish, umumiy manfaatlarimizdan kelib chiqib, xalqaro muammolar bo‘yicha yakdil va aniq pozitsiyamizni faol ilgari surish maqsadga muvofiqdir.

Bu o‘rinda gap, eng avvalo, Yaqin Sharqda davom etayotgan adolatsiz urush va kuzatilayotgan ikki yoqlama standartlar haqida bormoqda. G‘azo sektori va Livandagi misli ko‘rilmagan gumanitar fojiani, tinch aholiga qarshi vayronkor hujumlarni, ayniqsa, begunoh bolalar, keksalar va ayollar qurbon bo‘layotganini hech narsa bilan oqlab bo‘lmaydi. Birlashgan Millatlar Tashkilotining Falastin qochoqlariga yordam berish bo‘yicha maxsus agentligi faoliyatini cheklashga qaratilgan harakatlarni ham keskin qoralaymiz.

Mazkur ko‘p yillik nizoning yagona yechimi – xalqaro me’yoriy hujjatlar va rezolyusiyalarga muvofiq, 1967 yildagi chegaralar asosida, poytaxti Sharqiy Quddus bo‘lgan mustaqil Falastin davlatini tuzishdir», – dedi Shavkat Mirziyoyev.

O‘zbekiston yetakchisi, shu bilan birga, keyingi hafta Ar-Riyod shahrida o‘tadigan arab-musulmon davlatlari sammiti haqida ham to‘xtalib, sammitda bu muammoga aniq siyosiy yechim topilishiga umid qilishini bildirdi.

«Xavfsizlik haqida to‘xtalganda, Afg‘oniston masalasi Tashkilotimiz doirasida doimo diqqatimiz markazida bo‘lishi lozim. Bu borada vazirlar va ekspertlar darajasidagi muntazam muloqot mexanizmini yo‘lga qo‘yish muhimdir.

Afg‘onistondagi o‘tkir muammolarni hal etishda amaldagi hukumatga yordam ko‘rsatish, bu davlatni mintaqaviy iqtisodiy jarayonlarga keng jalb etish, ijtimoiy va infratuzilma loyihalarini ro‘yobga chiqarish masalalari albatta ko‘rib chiqilishi lozim, deb hisoblaymiz», – dedi O‘zbekiston yetakchisi.