Payshanba kuni Eronning ikkinchi yirik shahri hisoblanmish Mashhad shahrida ishsizlik va inflatsiyaga qarshi tinch namoyishga chiqqanlarning 52 nafari qamoqqa olingan. Eron hukumati esa ularni muxolifatga aloqadorlikda ayblagan. Bunga javoban esa juma kuni prezident Ruhoniyga nisbatan dushmanona kayfiyatdagi shiorlarni ko‘tarib yana namoyishga chiqishgan.

Oq Uy matbuot kotibi Sara Sandersning bildirishicha “korrupsiyadan va milliy boyliklarning xalqaro terrorizmni moliyalashga ishlatilishidan charchagan eronliklarning bunday tinch namoyishlari haqida ko‘plab ma’lumotlar bor.

Eron hukumati ularning huquqlarini hurmat qilishi kerak, ayniqsa so‘z erkinligini”, deya qo‘shimcha qiladi Sanders.

Shuningdek, AQSh prezidenti Donald Tramp ham xuddi shunday mazmundagi murojaat bilan o‘zining twitterdagi sahifasida #EronProtests heshtegi ostida chiqish qilgan.

O‘z navbatida, Eron rasmiylari sodir bo‘lgan namoyishlarda xorijdan uchinchi kuchlarning aloqadorligini iddao qilishmoqda. Jumladan Tehron vitse-gubernatori Muhsin Hamadoniy “qo‘lga olingan kishilar chetdan kelgan tashviqot ta’sirida bo‘lganlarini va buni o‘zlari bilmasliklarini” aytib o‘tgan.

Eron prezidenti Hasan Ruhoniy may oyida o‘tkazilgan saylovoldi chiqishlarida xalqaro sanksiyalar tufayli zaif holga kelib qolgan iqtisodiyotni ko‘tarishga va’da bergan edi.