Myunxenning «Bavariya» klubi va Angliya terma jamoasi hujumchisi Harri Keyn France Football jurnali, UYeFA va L’Équipe hamkorligida mavsumning eng yaxshi futbolchisiga topshiriladigan «Oltin to‘p» — 2026 sovrinini qo‘lga kiritdi.

Doim Fransiyada o‘tkazib kelingan taqdirlash marosimi birinchi marta Londonning «Palladium» teatrida bo‘lib o‘tdi. Sovrinni ikki karra jahon chempioni va «Oltin to‘p»ning ikki karra sohibi, braziliyalik Ronaldo topshirdi. Keyn faoliyatida ilk bor ushbu mukofotga sazovor bo‘ldi.

2025/2026 yilgi mavsumda Keyn «Bavariya» bilan Germaniya Superkubogi, Germaniya kubogi va Bundesliga chempionligini qo‘lga kiritdi. Angliya terma jamoasi safida esa 2026 yilgi jahon chempionatining bronza medaliga ega chiqdi. U 2025 yil avgustidan 2026 yil iyuligacha bo‘lgan davrda «Bavariya» va Angliya terma jamoasi uchun 65 ta o‘yinda 73 ta gol urdi.

Ovoz berish natijalariga ko‘ra, ikkinchi o‘rinni Madridning «Real» klubi va Fransiya terma jamoasi hujumchisi Kilian Mbappe egalladi. Kuchli uchlikni esa «Barselona» va Ispaniya terma jamoasi hujumchisi Lamin Yamal yakunladi.

Keyn 25 yil ichida «Oltin to‘p»ni qo‘lga kiritgan ilk angliyalik futbolchi bo‘ldi. 2001 yilda ushbu mukofot Maykl Ouenga nasib etgan edi. Keyn tarixda «Oltin to‘p»ga sazovor bo‘lgan beshinchi angliyalik futbolchi hisoblanadi.

Shuningdek, u so‘nggi 30 yil ichida Germaniya Bundesligasida to‘p suradigan klub futbolchilari orasida «Oltin to‘p»ni qo‘lga kiritgan ilk futbolchi bo‘ldi.

«Oltin to‘p» har yili France Football fransuz jurnali tomonidan taqdim etiladi. O‘tgan yili ushbu mukofotga PSJ va Fransiya terma jamoasi hujumchisi Usmon Dembele sazovor bo‘lgan edi.