Saudiya Pro-ligasining 21-turida «Al-Ohdud»ga qarshi o‘yinda «Al-Hilol» 6:0 hisobida g‘alaba qozondi, gollarning uchtasi jamoaning debyutanti Karim Benzema hisobiga yozildi.

Fransiyalik yulduz yaqindagina Jiddaning «Al-Ittihod» klubini tark etib, Ar-Riyod grandi «Al-Hilol» safiga qo‘shilgan edi. Ma’lumotlarga ko‘ra, 38 yoshli hujumchi bilan 2027-yilning yoziga qadar mo‘ljallangan shartnoma imzolangan.

Ma’lumot uchun: Karim Benzema «Al-Ittihod» safida jami 14 ta o‘yinda maydonga tushib, 8 ta gol kiritgan edi.

So‘nggi kunlarda Saudiya futbolida bo‘layotgan voqealar dunyo e’tiborini tortmoqda. Xususan, Benzema «Al-Ittihod» rahbariyati bilan munosabatlari yomonlashgani va shartnomani uzaytirish bo‘yicha taklifdan norozi bo‘lgani uchun klubdan ketgani aytilmoqda.

Benzemaning «Al-Hilol»ga o‘tishi hammadan ko‘p Krishtianu Ronalduning e’tiroziga sabab bo‘ldi. Ronalduga Saudiya Arabistoni davlat investitsiya fondi «An-Nasr»ga qaraganda «Al-Hilol»ga ko‘proq imtiyoz berayotgani yoqmayapti va sovrinlardan quruq qolish o‘z imijiga jiddiy ta’sir ko‘rsatishidan xavotirda. Umuman olganda, Ronaldu so‘nggi o‘yinlarda na maydonda, na atrofida ko‘rindi.