«Nasaf»ning OChL-2018 pley-off bosqichidagi raqibi — Iordaniyaning «Al-Faysaliy» klubi 8-18-yanvar kunlari Turkiyada yig‘in o‘tkazishga qaror qilgan. Bu haqda klub rasmiy saytiga tayanib, «Voha.uz» xabar bermoqda.

Klub 30-dekabr kuni yangi murabbiy bilan kelishuvga erishdi. Serbiyalik 39 yoshli mutaxasis Ivan Gvozdenovich klubning bosh murabbiyi hisoblanadi. U xorvatiyalik Dragan Talajichni almashtirdi.

Xabarga ko‘ra, «Al-Faysaliy» liviyalik legioner futbolchi Akram Zui bilan xayrlashgan. Bu legioner futbolchi FIFA tomonidan jazolangan 5 futbolchining biridir. Shuningdek klub Muxammad Al Alun bilan ham shartnomani bekor qilgan. Shunday qilib, «Al-Faysaliy» FIFA tomonidan jazolangan o‘z futbolchilari bilan birin-ketin xayrlashmoqda. Hozircha jamoa ixtiyorida ikki legioner futbolchi bor — senegallik Dominik va polshalik Lukas. Arab klubi tez kunlarda ular bilan ham xayrlashishi mumkin. Chunki murabbiylar bir qancha futbolchilarni ayni kunlarda nazoratdan o‘tkazmoqda.

Shuningdek klub bir qator mahalliy fubolchilarni o‘z tarkibiga qo‘shib ham olgan.

Eslatib o‘tamiz, OChL-2018 pley-off doirasidagi «Nasaf»–«Al-Faysaliy» uchrashuvi 30-yanvar kuni Qarshi shahridagi «Markaziy» stadionda soat 16:00da boshlanadi.