Xitoyda boshlangan 23 yoshgacha bo‘lgan terma jamoalar o‘rtasidagi Osiyo chempionatining «A» guruhidan o‘rin olgan Qatar va O‘zbekiston olimpiya terma jamoalari o‘rtasidagi uchrashuv yakunlandi.

Ravshan Haydarov boshchiligidagi terma jamoamiz musobaqadagi ilk uchrashuvida qatarliklarga imkoniyatni boy berdi. O‘yin taqdirini Almuaz Alining 55-daqiqada urgan goli hal qildi. Terma jamoamizning hisobni tenglashtirish uchun harakat qildi, ammo hech bir sa’y-harakat kutilgan natija bermadi. Bir vaziyatda Zabihillo O‘rinboyev juda qulay imkoniyatni golga aylantira olmadi.

Shu tariqa musobaqaga chempionlikni maqsad qilib borgan terma jamoamiz birinchi mag‘lubiyatini qabul qilishga majbur bo‘ldi.

Shu o‘rinda aytish kerakki, terma jamoa bosh murabbiyi Ravshan Haydarov musobaqadan oldingi intervyularidan birida O‘zbekiston terma jamoasi Osiyo chempioni bo‘lish uchun yetarli salohiyatga ega ekanini aytgan edi. Murabbiyning so‘zlari qanchalik haqiqatga yaqin ekanini aniqlash Xitoy termasiga qarshi o‘tadigan navbatdagi tur bellashuviga qoldi.

O‘zbekiston olimpiya terma jamoasi guruhdagi keyingi o‘yinni 12 yanvar kuni o‘tkazadi. Uchrashuv Toshkent vaqti bilan soat 13:00da boshlanadi. 

Osiyo chempionati U-23

Qatar OTJ - O‘zbekiston OTJ 1:0

Gol: A.Almuaz (55)

Changjou, «Olympic Sports Centre» stadioni.

Qatar OTJ: 22.Muhammad al-Bakari, 2.Tariq Salmon, 5.Tamiym al-Muhaza, 6.Abdulla al-Ahrak (23.Xolid Muhammad, 72),  8.Ahmad Muyin (s), 10.Akram Afif, 13.Sulton al-Brake, 15.Bassam al-Raviy, 16.Hishom Ali (Meshal Al-Shamariy, 85), 19.Almuaz Ali, 20.Salom al-Hajriy.

O‘zbekiston OTJ:12.Dilshod Hamroyev, 13.Islomjon Qobilov, 2.Rustam Ashurmatov, 3.Hojiakbar Alijonov, 4.Akrom Komilov, (16.D.Narzullayev, 52) 6.Azizjon G‘aniyev (11. Andrey Sidorov, 84), 7.Odilbek Hamrobekov, 8.Jasur Yaxshiboyev, 17.Doston Hamdamov (22.Bobur Abdixoliqov, 76), 10.Javohir Siddiqov, 9.Zabihillo O‘rinboyev.

Ogohlantirishlar: D.Hamdamov (29), A.Ahrak (45), M. al-Bakari (73), Bassam al-Raviy (78).