Raqamli texnologiyalar asrida shaxsiy hayot chegaralari tobora buzilmoqda. Yaqindagina Meta kompaniyasi tomonidan taqdim etilgan «Muse Image» sun’iy intellekt modeli foydalanuvchilar o‘rtasida jiddiy xavotirlarni keltirib chiqardi. Endilikda Instagramdagi ochiq profillar nafaqat do‘stlar, balki AI algoritmlari uchun ham ochiq «xomashyo» manbaiga aylandi.

Meta Superintelligence Labs tomonidan ishlab chiqilgan ushbu model Instagram Stories, WhatsApp va Meta AI ilovasida erkin faoliyat yuritadi. Texnologiyaning asosiy maqsadi — matnli so‘rovlar (prompts) yordamida yuqori sifatli vizual kontent yaratish va mavjud tasvirlarni tahrirlashdan iborat.

Model Instagramdagi ommabop (public) profillarga joylangan fotosuratlarni o‘rganish va ulardan yangi tasvirlar hosil qilish uchun foydalanadi. Eng xavotirli tomoni shundaki, agar profilingiz ochiq bo‘lsa, istalgan foydalanuvchi sizning suratingizni AI yordamida tahrirlashi yoki yangi kontekstga joylashtirishi mumkin.

Metaning yordamchi sahifasida keltirilgan qoidalarga ko‘ra, sun’iy intellekt vositalari orqali sizning suratlaringizdan foydalanilgan taqdirda, hech qanday bildirishnoma yuborilmaydi. Bu shuni anglatadiki, siz o‘z suratingizning kiber-makonda boshqa bir shaxs tomonidan boshqarilayotgani yoki AI yordamida o‘zgarganidan bexabar qolishingiz mumkin.

Texnologiya bozoridagi tahlilchilarning ta’kidlashicha, Meta ilgari Midjourney va Black Forest Labs kabi uchinchi tomon platformalari xizmatlariga tayanib kelgan bo‘lsa, endilikda to‘liq mustaqil tizimga o‘tishi ma’lumotlar bazasini yanada nazoratsiz kengaytirish imkonini bermoqda. Ayni damda kompaniya «Muse Video» loyihasini ham ishlab chiqmoqda, bu esa kelajakda videolar bilan bog‘liq xavflar ham ortishidan darak beradi.

O‘z shaxsiy ma’lumotlaringizni himoya qilish uchun quyidagi qadamlarni bajarishni tavsiya etamiz:

• Instagram profilingizdagi «Settings» (sozlamalar) bo‘limiga o‘ting;
• «Sharing and reuse» (ulashish va qayta foydalanish) qismiga kiring;
• O‘z postlaringiz va Reelslaringizning AI tomonidan qayta ishlanishiga ruxsatni o‘chirib qo‘ying.

Ushbu sozlamani o‘zgartirish kelajakdagi xavfsizligingizni ta’minlaydi, biroq tizim tomonidan allaqachon  o‘zlashtirilgan rasmlarni o‘chirib tashlamaydi.

Texnologik taraqqiyot qulayliklar bilan bir qatorda, shaxsiy daxlsizlik borasida yangi chaqiriqlarni keltirib chiqarmoqda. AI modellari o‘z rivoji uchun millionlab insonlar suratlaridan foydalanar ekan, foydalanuvchilar o‘z shaxsiy ma’lumotlari ustidan nazoratni kuchaytirishlari zarur. Kelgusida shaxsiy rasm va videolarni ijtimoiy tarmoqlarga yuklashdan avval, uning qanday maqsadlarda ishlatilishi mumkinligini o‘ylab ko‘rish — zamonaviy media madaniyatining ajralmas qismiga aylanadi.