Xitoyning Szyansi provinsiyasida 20 yildan beri qochib yurgan va qonun oldida javobgarlikdan yashirinib kelgan seriyali qotil Lao Junchji ustidan sud jarayoni boshlandi. Bu haqda «AsiaOne» xabar berdi.

1993-yili Szyansida boshlang‘ich maktabda o‘qituvchi bo‘lib ishlagan 19 yoshli Lao o‘g‘rilik qilgani uchun sakkiz yil qamalib chiqqan Fa Sziin bilan tanishib qoladi. Ular bir-biriga ko‘ngil qo‘yishadi va bir necha yillar davomida bosqinchilik, odamlarni olib qochish va o‘ldirish bilan shug‘ullanishadi.

Ikkita qotillikdan so‘ng 1999-yilda Xitoy politsiyasi ularning iziga tushadi. Er-xotin ijarada yashayotgan Xefey shahrida Fa qo‘lga tushadi. U suddan so‘ng o‘lim jazosiga hukm qilinadi va qatl etiladi.

Lao esa ta’qibdan qochib qutuladi. U ismini o‘zgartiradi, Xefeydan ketadi va 20 yil davomida yashirinib yuradi. 2019-yil noyabrda Futszyan provinsiyasi Syamin shahrida uni hibsga olishadi. Laoni qo‘lga tushirishganda u savdo markazida tanishi ochgan do‘konda qo‘l soatlari bilan savdo qilayotgandi.

Ayol 1996-yildan 1999-yilgacha qasddan sodir etgan yettita qotillikda, shuningdek, talonchilik va odam o‘g‘irlashda ayblanmoqda.