AQSh harbiylari Eronga tegishli beshta neft tankerini yo‘q qilganini ma’lum qildi. Vashington bu harakatni Eron Inqilob posbonlari korpusining so‘nggi ikki kun ichida AQSh harbiy kemasiga ikki marta ballistik raketa bilan hujum qilishga uringaniga javob deb izohladi.

AQSh Markaziy qo‘mondonligi ma’lumotiga ko‘ra, zarbalardan oldin tankerlar ekipajlariga kemalarni tark etish buyurilgan. AQSh tomoni harbiy kemasi Eron hujumlaridan qochib qolgani va amerikalik harbiylar jabrlanmaganini bildirgan.

Shundan keyin Eron Iordaniyadagi AQSh kuchlari joylashgan Al-Azraq bazasiga ballistik raketalar uchirganini ma’lum qildi. Iordaniya Qurolli kuchlariga ko‘ra, mamlakat hududi tomon 20 ta ballistik raketa uchirilgan, ularning 18 tasi havo mudofaasi tomonidan urib tushirilgan. Qolgan ikki raketa aholi yashamaydigan hududlarga tushgan. Qurbonlar qayd etilmagan.

So‘nggi zarbalar AQSh va Eron o‘rtasidagi keskinlikni yana kuchaytirdi. Tomonlar Ho‘rmuz bo‘g‘ozida nazoratni ta’minlash uchun ham kurashmoqda. Bu yo‘lak urush boshlanishidan oldin jahon neft savdosining taxminan beshdan bir qismi o‘tadigan muhim dengiz yo‘li edi.

Shu bilan birga, Tramp ma’muriyati Eron aviatsiya sohasiga qarshi yangi sanksiyalar joriy etib, o‘nlab aviakompaniya va yuk tashuvchilarni cheklovlar ro‘yxatiga kiritdi.