Birlashgan shtab boshlig‘i Anatoliy Sidorov boshchiligidagi Kollektiv Xavfsizlik Shartnomasi Tashkiloti (KXShT) missiyasining oldingi guruhi 15-sentyabr kuni Armanistonga boradi. Bu haqda TASS xabar berdi.

«KXShT chegaradagi vaziyatni baholash uchun Armanistonga tashkilot missiyasini yuborish haqidagi kelishuvlarni amalga oshirishga kirishdi», – deya qo‘shimcha qildi tashkilot.

KXShT Armaniston-Ozarbayjon chegarasidagi vaziyatni baholash uchun Armanistonga Bosh kotib Stanislav Zas boshchiligidagi missiya yuborishga qaror qildi. U mintaqadagi vaziyat to‘g‘risida hisobot tayyorlaydi, shuningdek, mojaroni yumshatish variantlarini taklif qiladi. Hujjat Kollektiv xavfsizlik kengashining kuzda Yerevanda bo‘lib o‘tadigan sessiyasida davlat rahbarlariga taqdim etiladi.

Ma’lumot o‘rnida, 13-sentyabr kuni Armaniston Mudofaa vazirligi Ozarbayjonni Sotka, Goris va Jermuk aholi punktlari yo‘nalishida o‘t ochishda aybladi. O‘z navbatida, Ozarbayjon Mudofaa vazirligi Armanistonni ikki davlat chegarasida keng ko‘lamli qo‘poruvchilik qilishda aybladi.