Turkiyaning baxt sohili bo‘lgan firuza rangli Egey mintaqasi har qanday did va tajriba darajasiga mos keladigan turli yo‘nalishlarga ega velosiped ixlosmandlari uchun bamisli “jannat”dir. Marshrutlar shunchalik ko‘p qirraliki, har qadamda velosipedchilarni jalb qiluvchi betakror qirg‘oqlar va ko‘zni qamashtiruvchi landshaftlardan tortib tarixiy qishloqlar, qadimiy hamda Cittaclow shaharlari va mazali, sog‘lom Egey taomlarini uchratish mumkin.

Shuningdek, mintaqaning velosiped imkoniyatlari nafaqat marshrutlarni o‘z ichiga oladi, balki velosipedlar uchun xavfsiz to‘xtash joyi, velosipedlarni tozalash va ta’mirlash xizmatlari kabi ko‘plab qulayliklarga ega turar joy muqobillari bilan e’tiborga molikdir.

Tarix va tabiat bo‘ylab velosiped haydash: EuroVelo 8

Butun Yevropa qit’asini uzoq masofali velosiped yo‘nalishlari bilan bog‘laydigan EuroVelo tarmog‘iga Turkiyaning birinchi qo‘shilishi EuroVelo 8 orqali amalga oshiriladi. O‘rta yer dengizi yo‘nalishi sifatida ham tanilgan EuroVelo8 jami 5900 km bo‘lib, 11 mamlakatdan o‘tadi. Marshrutning qariyb 500 kilometri Turkiyaning uchinchi yirik shahri bo‘lgan Izmirdan o‘tadi.

Marshrutning birinchi bekati Pergamon antik shahri bo‘lib, u yerdan Izmir qushlar jannati, Karshiyaka, Alsanjak, Seferihisar, Sigajik, Urla va Alachati kabi xushmanzara joylardan o‘tadi va oxiri qadimgi Efes shahrida tugaydi. YuNESKOning ikkita Jahon merosi ob’yekti - Pergamon va Efesga qo‘shimcha ravishda, velosipedchilar ko‘plab qishloqlarda, dam olish maskanlarida va Cittaclowda (Seferihisar) marshrut bo‘ylab to‘xtashlari mumkin.

Shuningdek, Gediz deltasidagi Qushlar jannatida flamingolarni tomosha qilish, Karshiyaka va Alsancak sohillari bo‘ylab ajoyib manzaralardan bahramand bo‘lish, Urla uzumzorlari yo‘lidagi mahalliy vino zavodlariga tashrif buyurish va hatto Alachatida shamol serfingini sinab ko‘rish mumkin.

Marmaris tog‘i velosiped yo‘llaridagi cho‘qqilarni zabt etish

Sarguzashtga boy velosiped tajribasini afzal ko‘rganlar uchun Marmaris tog‘i velosiped yo‘llari ayni muddaodir. Ushbu marshrutlar past baland tepaliklar, tik ko‘tarilish va hayajonli tushish kabi sarguzashtsevar velosipedchilar uchun mo‘ljallangan bo‘lib, Marmarisni o‘rab turgan qarag‘ay o‘rmonlari va tog‘li landshaftlardan o‘tib, yam-yashil o‘rmonlar, qo‘l tegmagan ko‘rfazlar, baliq ovlash qishloqlari va Egey dengizi turkuaz suvlarining ajoyib manzaralarini taqdim etadi.

Masalan, Marmaris-Chamlibel-Go‘kbel yo‘nalishi velosipedchilarga toza tepaliklarda sukunat va kisloroddan bahramand bo‘lish imkonini bersa, Marmaris-Karajaso‘g‘ut yo‘nalishi esa Amnistos qadimiy shahridan boshlanib, organik qishloq Yeshilbeldedan o‘tadi. Karajaso‘g‘ut ham “moviy sayohat” yo‘nalishidir. Oxirgi bekat ingliz bandargohi bo‘lib, Ikkinchi jahon urushi paytida nemis flotidan qochgan Britaniya suv osti kemalarining boshpanasi edi. Mintaqadagi eng mashaqqatli tog‘ velosiped yo‘li Selimiye-Orhaniye-Bayirdir. Boshlanish nuqtasi baliqchilar mahallasi Selimiye bo‘lib, 58 kilometrlik marshrutda velosipedchilar 1285 metr balandlikka ko‘tariladi.

Ushbu mashhur yo‘llarga qo‘shimcha ravishda, Marmaris va uning atrofida juda ko‘p qiyin yo‘llar mavjud. Qisqa Ichmeler-Jamiyani yo‘lidan tortib Marmaris-Bo‘rdubet Yedi Adalar va Chanli-Karajagacha bo‘lgan plyajlar va sokin yo‘llarni birlashtirgan manzillar adrenalin izlovchilar uchun juda ko‘p imkoniyatlari bilan maqtovga loyiqdir.

Ko‘yjeg‘iz-Ortaca-Dalamandagi EKO yo‘llari

Egey va O‘rta yer dengizlari, Kariya va Likiya sivilizatsiyalarining kesishgan nuqtasida joylashgan Ko‘yjeg‘iz, Ortaja va Dalaman tumanlari Dalyan turizm, madaniyat va atrof-muhitni muhofaza qilish uyushmasi tomonidan yaratilgan noyob EKO yo‘llarini taklif qiladi. Yo‘nalishlar orasida Ko‘yjeg‘izda beshta, Ortajada to‘rtta, Dalamanda beshta va ulanish yo‘llari mavjud.

Qizil yo‘nalish belgilari bilan belgilangan har bir marshrut taxminan 30 km uzunlikda bo‘lib, har kimga o‘z darajasi va qiziqishlariga mos marshrutni tanlash imkonini beradi. EKO Trails tabiiy boyliklar va kashfiyot imkoniyatlari bilan to‘la. Masalan, Ko‘yjeg‘iz ko‘li, Alag‘al, Suluklu, Sulungur va Iztuzu ko‘llari kabi suvli yerlar mintaqaning xilma-xilligini aks ettiradi, Kojag‘ol va Go‘kcheova hovuzlari esa sokin muhiti bilan ajralib turadi.

Yuvarlakchay va Kepez kanyoni kabi tabiat mo‘’jizalari ajoyib manzaralarni taqdim etsa, Chichekbaba, Chal va O‘lemez kabi tog‘lar tabiatning turli sirlarini kashf etadi. Velosipedchilar marshrut bo‘ylab qarag‘ay daraxtlari orasida toza havodan nafas olib, firuza ko‘l suvlarida salqinlashar, shuningdek, dengiz “caryetta caryetta”lari, Likiya salamandri va Izmir baliqlari kabi noyob turlarni kuzatishlari mumkin. Shuningdek, Kaunos, Pisilis, Lida, Oktapolis, Telmetssos va Kibyra kabi qadimiy shaharlarga tashrif buyurib, uch mintaqaning tarixi va madaniyati bilan yaqindan tanishish mumkin.