Joriy yil 25-yanvar kuni mahalliy vaqt bilan soat 16:20 larda Rossiyaning Belgorod viloyatida xakerlar telesignallarni ruxsatsiz almashtirib, efirga Ukraina Prezidenti Vladimir Zelenskiyning murojaatini qo‘yib eshittirgan. Bu haqda RBK nashri xabar bermoqda.

«Bugun, 25-yanvar kuni sun’iy yo‘ldoshdan televizion signalni ruxsatsiz almashtirishdi. Navbatchilar tezkorlikda zaxira sun’iy yo‘ldoshdan signal qabul qilishga o‘tishdi va televizor signalining eshittirishi odatdagidek davom etdi. Sabablari aniqlanmoqda», – deyiladi matbuot xizmati xabarida.

Qrim rahbari maslahatchisi Oleg Kryuchkovning so‘zlariga ko‘ra, mintaqada ham xuddi shunday voqea sodir bo‘lgan.

«Zelenskiyning murojaati telekanallar orqali translyasiya qilinmagan. Vaziyatni tushuntirishga harakat qilaman: Qrimda efirga uzatish ishonchli himoyalangan va hamma narsa dastur tarmoqlari bo‘yicha odatiy rejimda efirga uzatiladi. Jumladan, internet orqali uzatiladigan telekanallar ilovalari ham.

Ammo maxsus operatsiya (Rossiyaning Ukrainaga qarshi urushi, -tahr.) boshida ushbu ilovalarning dasturiy kodlari Ukraina maxsus xizmatlariga o‘tkazilgan. Hozirda hamma telekanallar ham, internetda ishlaydigan kabel operatorlari ham xavfsiz dasturiy ta’minotga ega deb bo‘lmaydi», – deydi Kryuchkov.

U shu sababli vaqti-vaqti bilan «bunday hodisalar» yuzaga kelishini qo‘shimcha qilgan va tez orada internet-ko‘rsatuvlar ishonchli himoya qilinishiga va’da bergan.

Rossiya hukumati vakillari kiberhujumda Ukraina xakerlari qo‘li borligini va ularga AQSh maxsus xizmatlari tomonidan yordam ko‘rsatilganligini ma’lum qilgan.