Meksikada Kotixa shahri meri Iolanda Sanches o‘ldirildi. Bu Klaudiya Sheinbaum birinchi ayol prezident sifatida saylanganidan bir necha soat o‘tgach sodir bo‘ldi.

Iolanda Sanches shahar markazida pistirmaga uchragan. Mahalliy matbuotning yozishicha, unga 19 marta o‘q uzilgan.

Sanches hujumdan ko‘p o‘tmay shifoxonada vafot etdi. Otishma paytida uning qo‘riqchisi halok bo‘lgan.

Hozircha hech kim hibsga olinmagan, biroq shaharda hujum ortida uyushgan jinoiy guruhlardan biri turganiga shubha qilishmayapti. 

2021-yil sentyabr oyidan Kotijaning birinchi ayol meri bo‘lgan Iolanda Sanches unga nisbatan tahdidlar haqida xabar berdi. 2023-yilda u qo‘shni Xalisko shtatiga tashrifi chog‘ida uni qo‘lga olgan qurolli odamlar tomonidan uch kun davomida qurol ostida ushlab turilgan.

Siyosatchining so‘zlariga ko‘ra, o‘g‘irlaganlar ma’lum talablar qo‘ygan va uni «psixologik terror»ga duchor qilgan.

Sanches ularning qaysi jinoiy guruhga mansubligini bilmasligini aytgan bo‘lsada, mahalliy gazetalar, ehtimol, SJNG karteliga a’zo bo‘lganini xabar qilishdi.

SJNG giyohvand moddalar savdosi va to‘lov uchun odam o‘g‘irlash bilan shug‘ullanadi. Kartel a’zolari, shuningdek, o‘z buyruqlarini bajarishdan bosh tortgan hukumat amaldorlariga hujum qilishlari bilan mashhur.