Rossiyaning Yekaterinburg shahri Lenin tumani sudi 23 yoshli Danil Fominni hibsga olish haqida qaror chiqardi. U Ural federal universitetida tahsil olib kelayotgan gabonlik talaba Fransua Ndjelassilini o‘ldirishda ayblanmoqda.

Ayblov tomoni Danil Fomin hodisadan keyinoq qochishga uringanini aytib, uni sudga qadar qamoqqa olishni so‘ragan. Mahkama so‘rovni ma’qullagan. Yigitga nisbatan Rossiya Jinoyat kodeksining 105-moddasi (qotillik) bo‘yicha ish ochilgan.

32 yoshli Fransua Ndjelassili 18-avgust kuni Yekaterinburg markazidagi «Burger King” tamaddixonasida janjal payti o‘ldirilgan.

Marhum talabaning yaqinlariga ko‘ra, tamaddixonada Fransuaning oldiga ikki yigit kelib, «Buni qara, negr-ku, kel, uning tanobini tortib qo‘yamiz» degan mazmunda luqma tashlagan va unga pichoq bilan hamla qilgan.

Talaba tez yordam mashinasida vafot etgan. Gumonlanuvchi esa ertasi kuni qo‘lga olingan.

Ural federal universiteti ma’muriyati Fransua Ndjelassili «Rossiya madaniyatini hurmat qilgani», Yekaterinburgga o‘z mamlakati Gabon iqtisodiyotini rivojlantirish uchun bilim olish maqsadida kelganini ma’lum qilgan. Ndjelassili iqtisodiyot kafedrasi aspiraturasida tahsil olgan. 2019-yilda «Yilning xorijlik talabasi» nominatsiyasi g‘oliblaridan biri bo‘lgan.

Talabaning do‘stlari tamaddixonadagi ziddiyat irqiy toqatsizlik sabab ro‘y bergani, endilikda boshqa xorijlik talabalar ko‘chaga chiqishga qo‘rqib qolganini aytgan.

Telegramdagi neonatsistik yo‘nalishdagi yopiq kanallardan biri gumonlanuvchiga advokat yollash uchun pul yig‘ayotgani xabar qilingan.

D.Fominning tanishlari va yaqinlari esa ziddiyat irqiy kamsitish sabab ro‘y bergan degan versiyani rad etmoqda. Ularga ko‘ra, ixtilof qizlar sabab kelib chiqqan. Gumonlanuvchining ota-onasi marhum talaba va uning do‘sti birinchi bo‘lib janjal ko‘targani haqida gapirgan.

Gabon Respublikaci o‘z fuqarosining o‘limi ortidan Rossiya tashqi ishlar vazirligidan tergov-surishtiruv jarayoni haqida zudlik bilan ma’lumot berishni talab qilgan.