Rossiyalik mashhur yutuber Nikita Vasin 3 dekabrga o‘tar kechasi Moskvada vafot etdi, deb xabar bermoqda BAZA telegram-kanali. 22 yoshli Nikita Vasinning o‘limiga giyohvand moddalarni me’yoridan ortiq iste’mol qilish sabab bo‘lgani aytilmoqda.

Qayd etilishicha, 2 dekabr kuni kechqurun Vasin sherigi bilan birga Moskva markazidagi kvartirada taqiqlangan moddani qabul qilgan, shundan so‘ng ikkisi ham o‘zlarini yomon his qilishgan.

Blogerning sherigi tez yordam chaqirishga muvaffaq bo‘lgan, voqea joyiga yetib kelgan shifokorlar uni olib ketishga qaror qilishgan. Behush holda kasalxonaga olib ketilgan yutuber keyinchalik jonlantirish bo‘limida vafot etgan.

BAZA nashri politsiya xodimlari xonadondan narkotik modda qoldiqlari bo‘lgan sumkani topishgani haqida yozgan.

Eslatib o‘tamiz, Nikita Vasin rus va xorijiy multfilmlarning videosharhlari bilan tanilgan videobloger hisoblanadi. «Smeshariki» animatsion seriali sharhiga bag‘ishlangan videolar unga mashhurlik keltirgan. Uning YouTube-kanalida 486 ming obunachi bor edi.