Rossiya mudofaa vaziri Sergey Shoygu Ukrainaga qarshi urushda «shiddatni saqlab qolish uchun» qurol va harbiy texnika yetkazib berishni ko‘paytirish kerakligini ma’lum qildi.

Shoygu birlashgan kuchlar guruhi shtab-kvartirasida yig‘ilish o‘tkazib, Ukrainadagi harbiy guruhlar qo‘mondonlarining hisobotlarini tingladi va Rossiya harbiylari «maxsus operatsiya rejasiga muvofiq jangovar topshiriqlarni bajarishda davom etayotganini» aytdi.

«Hujum sur’atini saqlab qolish va qo‘shinning jangovar kuchini oshirishni ta’minlash uchun yetkazib beriladigan qurol va harbiy texnika, birinchi navbatda, qirg‘in qurollari hajmi va sifatini oshirish kerak», — dedi Shoygu.

Ukraina Qurolli kuchlari bosh qo‘mondoni Aleksandr Sirskiy yaqinda frontdagi vaziyatning keskinlashuvi va rus qo‘shinlarining taktik muvaffaqiyatlari haqida gapirgandi.

Rossiya harbiylari Ukrainaga o‘q-dori va qo‘shimcha kuchlar yetishmasligi sharoitida ba’zi muvaffaqiyatlarga erishdi. Kiyev qudratli ittifoqchisi bo‘lgan AQShdan taxminan olti oy davomida harbiy yordam olmadi.

Urushni o‘rganish instituti (ISW) ekspertlarining ta’kidlashicha, yaqin haftalarda AQShning yangi harbiy yordami kelishi boshlanishidan oldin, rus qo‘shinlari sezilarli taktik yutuqlarga erishishi mumkin, ammo Ukraina mudofaasini sindira olishi dargumon.