22-sentyabr kuni bo‘lib o‘tgan referendumda Shveysariya aholisi hukumat ilgari surayotgan pensiya islohotiga qarshi ovoz berdi, deyiladi Bloomberg xabarida.

Islohot pensiyani qayta hisoblash koeffitsiyentini 6,8 foizdan 6 foizga kamaytirishni nazarda tutardi, uning asosida pensiya to‘lovlari miqdori hisoblab chiqiladi. Dastlabki ma’lumotlarga ko‘ra, saylovchilarning faqat uchdan bir qismi qonun loyihasini qo‘llab-quvvatlagan. Endi Shveysariya hukumati muqobil pensiya islohoti haqida bosh qotirishiga to‘g‘ri keladi.

Mart oyida ham Shveysariyada referendum o‘tkazilgan va aksariyat aholi katoliklarning Rojdestvo bayrami arafasida 13-pensiya (13-oylik kabi) berilishini ma’qullagandi. Shuning barobarida, shveysariyaliklar pensiya yoshini 65 dan 66 yoshga oshirish taklifini rad etishdi.

Hisob-kitoblariga ko‘ra, pensiya islohotining qabul qilinmasligi oqibatida davlat budjetiga yiliga 4 mlrd shveysar franki ($4,52 mlrd atrofida) miqdorida bosim tushadi. Ammo yaqin yillarda pensiyalarni to‘lash uchun puldan muammo bo‘lmaydi, deya va’da bermoqda hukumat o‘z xalqiga.