Har bir xalq va millatlarda tongni qarshilashning o‘ziga xos odatlari bor. Kimdir quyosh chiqishini kuzatishni xush ko‘rsa, boshqalar ertalabdan syorfing (to‘lqinlar orasida maxsus sport taxtasida suzish)ga chiqadi yoki qahva ichib tongni qarshilaydi.    

 Yaponiya: quyoshni qarshi olish

Yaponiya «Quyosh chiqar yurt» deb ataladi va bu tasodif emas. Bu yerda tong quyosh chiqishi bilan o‘ziga xos tarzda qarshilanadi. Odamlar quyoshning ilk nurlarini kuzatish uchun tog‘lar yoki dengiz bo‘ylariga chiqishadi. Bu yangi umid va baxt ramzi hisoblanadi.

Braziliya: syorfing va raqs bilan tong

Rio-de-Janeyro aholisi tongni bayram kayfiyatda kutib oladi. Ertalabdan plyajda yuguradiganlar, dengiz bo‘yida musiqa tinglab raqsga tushadiganlar va maxsus taxtada to‘lqinlararo suzadiganlar ko‘p. Braziliyaliklar uchun ertalabki soatlar –tetiklik va kuch yig‘ish vaqti.

Hindiston: Gangada ibodat va poklanish

Hindistonliklarning ko‘pchiligi tongni muqaddas Ganga daryosida cho‘milib ibodat qilish bilan kutib oladilar. Ular uchun bu nafaqat jismoniy, balki ma’naviy poklanishning ramzi hamdir. Hindlar tongni yangi umidlar bilan boshlash uchun tabiat va ruhan tozalanishga e’tibor qaratadilar.

Italiya: qahva va sukunat

Italiyaliklar uchun tong – bu zavq bilan kutib olinadigan vaqt. Kichik qahvaxonalarda espresso yoki kapuchino qahvasini ichish, gazetalarni varaqlab, kechagi voqealardan xabardor bo‘lish ularning kundalik odatidir. Ertalabni sukunat va zavq bilan boshlash – italyanlar uchun hayot tarzi.

Niderlandiya: velosipedda tong sayri

Gollandiyaliklar uchun ertalabki vaqt – faollik vaqti. Ular kunni velosiped sayri bilan boshlashadi. Ertalabdanoq shaharlar toza havoda harakatlanayotgan yuzlab velosipedchilar bilan to‘ladi – odamlar ish yoki o‘qishga aynan shu transportda yo‘l oladi. Bu nafaqat sog‘lom turmush tarzi, balki ekologik jihatdan ham foydali odatdir.

 Norvegiya:  tong bayrami

Norvegiyada qish oylarida ayrim hududlarda quyosh chiqmaydi. Bir necha oylik qorong‘ilikdan so‘ng, birinchi tong nurlari paydo bo‘lishi – haqiqiy bayram!   Odamlar quyoshning ilk nurlarini kutib olish uchun yig‘ilishadi va buni bayramona nishonlaydilar.

Avstraliya: syorfing bilan uyg‘onish

Sidney va Gold Kost kabi joylarda odamlar tongni okean to‘lqinlariga qarshi suzib qarshilaydilar. Bunday mashg‘ulot nafaqat sport, balki kunni yengil va zavqli boshlash usuli hamdir. Avstraliyaliklar uchun bu nafaqat zavq, balki hayot tarzining ajralmas qismi.

Har bir xalq va madaniyat tongni o‘zgacha tarzda qarshi oladi. Kimdir sukunatni xush ko‘radi, kimdir shovqin-suron bilan kutib oladi, boshqalar esa tabiat qo‘ynida uyg‘onishni ma’qul ko‘radi. Siz bugun tongni qanday qarshiladingiz?