Xitoyning Uxan shahrida pnevmoniyaning yangi turidan ikkinchi odam nobud bo‘ldi. Laboratoriya tadqiqotlari kasallikning keng tarqalishiga 2019-nCoV koronavirusi sabab bo‘layotganini ko‘rsatdi. Bori shu...

Kasallik haqida boshqa ma’lumot-tafsilotlar yo‘q.

Xitoyda tarqagan yangi kasallik virusi 16-yanvar kuni Jenevada Jahon sog‘liqni saqlash tashkiloti (JSST) konferensiyasida muhokama qilindi.

«2019-nCoV koronavirusi haqida yetarlicha ma’lumotga ega emasmiz, qanday tarqaydi, klinik alomatlari nimalarda ko‘rinadi, tarqalish darajasi qanday — bilmaymiz. Qanday paydo bo‘lgani ham bizga noma’lum», — TASS JSST bayonotidan ana shu iqtibosni keltirmoqda.

Koronavirus 2019-yil oxirida aniqlangandi. Avvaliga barcha kasallanganlar Uxan shahrida (Xitoy) qayd etildi. 2020-yil yanvaridan boshqa mamlakatlarda ham shu kasallikka chalinganlar aniqlana boshlandi.  16-yanvar kuni Yaponiyada Xitoydan kelgan bemorni laboratoriyada tekshirib, bu pnevmoniyaning yangi turi degan to‘xtamga kelishdi. Tailandda ham xuddi shu kasallikka chalingan bir nafar bemor aniqlangan.