Қатардаги жаҳон чемпионати F гуруҳининг 2-тур иккинчи ўйинида Хорватия Канадани мағлубиятга учратди.

Канада терма жамоаси ҳимоячиси Алфонсо Дэвис 2-дақиқадаёқ ҳисобни очди. Дарвозабон Милан Борян олис зарбаси билан ҳужумни бошлаб берди, ундан тўпни қабул қилган Бюкененнинг жарима майдонига узатмасини Дэвис голга айлантирди. Дэвиснинг бош билан урган голи Канаданинг мундиаллар тарихидаги илк голига айланди.

36-дақиқада хорватлар ҳужумчиси Андрей Крамарич мувозанатни тиклади: Иван Перишичнинг узатмасини яқин масофадан дарвозанинг пастки бурчагига аниқ йўллади — 1:1.

Орадан кўп ўтмай жаҳоннинг вице-чемпионлари Ливаянинг голи эвазига олдинга ўтиб олишди —2:1

Иккинчи бўлим ўрталарида яна Перишич-Крамарич жуфтлиги ўзини кўрсатди — 3:1.

Ўйинга қўшиб берилган дақиқаларда Ловро Майер сўнгги голни киритди — 4:1.

ҚАТАР-2022. F ГУРУҲИ. 2-ТУР

Хорватия — Канада — 4:1

Голлар: Крамарич (36, 70), Ливая (44), Майер (90+4) — Дэвис (2).

Аввалроқ ўтказилган ўйинда Марокаш Белгияни 2:0 ҳисобида мағлубиятга учратган эди.

2-турдан сўнг 4 очко тўплаган Хорватия тўплар нисбатига кўра F гуруҳи пешқадамига айланди. Иккинчи ўриндаги Марокаш ҳисобида ҳам 4 очко бор. Белгия (3 очко) учинчи, Канада (0 очко) сўнгги ўринда. Канада турнирни тарк этди. Белгия эса гуруҳдан чиқиш учун 3-турда Хорватияга қарши жуда қийин имтиҳондан ўтишига тўғри келади.