Жорий йилнинг 18 февраль куни Қўқон шаҳрининг Садоқат маҳалласида нохуш воқеа содир бўлди. Бу ҳақда ИИВ матбуот котиби хабар берди.

1988 йилда туғилган фуқаро А.Ш. маҳалла профилактика инспектори, катта лейтенант Жаҳонгир Маҳмудовга мурожаат қилиб, 2010 йилда туғилган ўғли, ўрта мактабнинг 9-синф ўқувчиси Ў.Ў.нинг хулқ-атворида жиддий ўзгаришлар кузатилаётгани, у уйда оила аъзолари билан жанжаллашаётгани ҳамда мактабга боришдан бош тортгани ҳақида хабар берган.

Ҳолатни ўрганиш мақсадида манзилга етиб борган профилактика инспектори мурожаатчи аёлга фарзанди билан инспектор-психолог иштирокида профилактик суҳбат ўтказиш заруратини тушунтираётган вақтда кутилмаган ҳолат юз берган. Ў.Ў. орқа томондан яқинлашиб, инспекторнинг чалғиб турганидан фойдаланиб, қўлидаги ошхона пичоғи билан унинг чап орқа бел қисмига зарба берган.

Оғир жароҳат олганига қарамасдан, катта лейтенант Жаҳонгир Маҳмудов зудлик билан гумонланувчини жисмоний куч ишлатган ҳолда зарарсизлантириб, воқеа жойига ёрдамчи кучларни чақиртирган.

Ички ишлар органларининг тезкор ходимлари етиб келгач, хонадонда яшовчи фуқаролар хавфсизлиги тўлиқ таъминланган. Жароҳатланган инспектор шифохонага етказилиб, жонлантириш бўлимига ётқизилган.

Шифокорларнинг дастлабки хулосасига кўра, унга “кўкрак қафаси чап орқа томони плевра бўшлиғига тешиб ўтган жароҳати, чап томонлама гемопневматоркс, ташқи ва ички қон кетиш” ташхиси қўйилган. Айни пайтда унга зарурий тиббий ёрдам кўрсатилмоқда.

Ҳолат юзасидан Ўзбекистон Республикаси Жиноят кодекси 104-модда 2-қисми “б” банди билан жиноят иши қўзғатилган. Гумонланувчи процессуал тартибда ушланган.

Тергов ҳаракатлари давом этмоқда.