Ҳуқуқий чеклов чоралари қўлланмаган фуқаронинг четга чиқишида муаммо борми? Албатта, йўқ. Фақат белгиланган тартибга биноан ҳужжат расмийлаштирса, кифоя, у ёғига — оқ йўл: ой бориб, омон келинг!

Биласиз, мамлакатимиз фуқароларнинг хорижга чиқиши масаласида қатор ўзгаришлар рўй берди, бу жараёндаги ортиқча оворагарчиликларга барҳам берилмоқда. Шунга қарамай, тегишли тартиблардан «сакраб ўтиб», четга чиқаётганлар учраб турибди-да. Худдики, шаҳар бедарвозадек.

Ботир Бўриев (исми-шарифи ўзгартирилди) четга чиқишнинг «осон йўли»ни топгандек эди гўё. Яъники, хорижга чиқиш учун биометрик паспортини расмийлаштирмасдан, аввалига Украинага учди, у ердан Туркияга. Бор-йўғи тўққиз кунлик сафари юртга қайтгач, ўзига қимматга тушишини билмасмиди?!

Хуллас, у «Истанбул-Тошкент» йўналишидаги НУ-272-сонли авиарейс билан учиб келгач, Ислом Каримов номидаги Тошкент халқаро аэропортида чегара назорати дивизиони ходимлари томонидан тўхтатилди: окаси, четга қонунга хилоф равишда чиқибсиз-ку?! Бунинг оқибати нима бўлишини биласизми?

Натижада унга нисбатан Ўзбекистон Республикаси ЖКнинг 223-моддаси 1-қисми билан жиноят иши қўзғатилиб, иш судга оширилди.

Ўқилган қонуний ҳукмдан тегишли хулоса чиқариб олса керак. Яна қайдам...

Ж.Нажимов