Наманган вилояти Уйчи туманида 1972 йил 6 сентябрда туғилган Охунов Нодирали Тоҳирович Ўзбекистон Республикаси Жиноят кодексининг 159-моддаси учинчи қисми билан 12 йил муддатга озодликдан маҳрум этилган.

Унинг айтишича, Россияда ишлаб юрган вақтларида интернет тармоқларида турли диний маърузаларни эшитиб, радикал ғоялар таъсирига тушиб қолган. Хусусан, “Абдулла Бухорий” тахаллуси билан танилган шахснинг Туркиядаги мадрасаси билан боғлиқ маърузаларини мунтазам кузатиб борган.

Шундан сўнг у Туркияга йўл олган ва кейинчалик Суриянинг Идлиб шаҳрида жойлашган, ўзбеклар жамоати сифатида тилга олинадиган гуруҳга қўшилган. Унинг таъкидлашича, у ерда дастлаб бир ҳафта бўлган, сўнг бошланғич ҳарбий тайёргарлик лагерига юборилган.

“У ерда ҳеч кимни аяшмайди. Борганингиздан кейин телефонларингизни олиб қўйишади. Аввал мадрасада сақлашади, кейин ҳарбий лагерга жўнатишади. Шаҳардан чиқишга ҳам рухсат берилмайди. Чегарадан ўтаётганда қанча одам ҳалок бўлганини кўрдик. Қанча ўзбек ёшлари, аёллар йўлда қолиб кетди. Ҳар куни осмонга қараб яшайсиз, устингиздан бомба ёғилишидан ҳадиксираб...”, — дейди у.

Охунов Нодирали ўз қилмишидан пушаймон эканини билдириб, ёшларни бундай йўлдан юрмасликка чақирди.

“Илмсизлик оқибатида ишониб борган эканмиз. Адашган йўлнинг оқибати — мана шу ер. Жуда кўп нарсадан маҳрум бўлдим. Ёшларимиз шошилиб кетишмасин, бундай жойларга бормасин. Огоҳ бўлинглар”, — дейди у.