Андроид қурилмалар учун Xabar.uz мобил иловаси. Юклаб олиш ×

Коррупцияга қарши курашиш тизими янада такомиллаштирилади

Коррупцияга қарши курашиш тизими янада такомиллаштирилади

Фото:«Ҳуқуқий ахборот»

Жорий йил 27 май куни Ўзбекистон Республикаси Президентининг «Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида»ги Фармони қабул қилинганди.

Мазкур фармон билан 2019-2020 йилларда коррупцияга қарши курашиш давлат дастури тасдиқланди.

Шу билан бирга, давлат ҳокимияти ва бошқаруви органлари, жамоат бирлашмалари ва бошқа ташкилотларга Давлат дастурининг ҳар бир банди бўйича мақсадларга эришишда самарадорлик индикаторларини ишлаб чиқиш вазифаси топширилди.

Энг муҳими, давлат хизматчиларини танлов асосида саралаб олиш, лавозимга тайинлаш ва юқори лавозимларга кўтаришнинг шаффоф тартибига асосланган давлат хизмати тизимини шакллантириш белгиланди.

Шунингдек, давлат хизматчилари учун чекловлар, тақиқлашлар, рағбатлантириш чоралари ҳамда коррупциянинг олдини олиш бошқа механизмларининг аниқ рўйхатини белгилаш зарурлиги мустаҳкамланди.

Қайд этиш жоизки, эндиликда 2019 йил 1 июлдан бошлаб давлат органлари зиммага юкланган вазифа ва функцияларни амалга оширишда юзага келадиган коррупция хавф-хатарларини вақти-вақти билан мажбурий баҳолаб бориладиган механизм ишга тушадиган бўлди.

Ўз навбатида, унинг якунлари бўйича коррупция хавф-хатарига энг кўп дуч келадиган давлат хизматчиларининг фаолият соҳалари ва лавозимлари, шунингдек, уларнинг ваколатларининг рўйхати шакллантирилади, шунингдек, идоравий коррупцияга қарши курашиш дастурлари ижросининг ҳар чораклик мониторингини амалга ошириш ва коррупциявий хавф-хатарларни камайтириш чораларини кўриб борилади.

Бундан ташқари, мазкур Фармонга асосан давлат хизматчилари даромадларини декларация қилиш тизимини босқичма-босқич жорий этиладиган бўлди.

Шу билан бирга, уларнинг иш ҳақи етарли даражада бўлишини таъминлаш, шунингдек, давлат хизматини ўташда манфаатлар тўқнашувини ҳал этишнинг ташкилий-ҳуқуқий асосларини такомиллаштирилиши назарда тутилди.

Ушбу Фармонда назарда тутилган янгиликлардан яна бири сифатида 2019 йил 1 августдан бошлаб эксперимент тариқасида, аввало, капитал қурилиш ва олий таълим соҳаларида «Коррупциясиз соҳа» лойиҳасини амалга оширишни ташкил этиш, 2020 йил 1 апрелдан бошлаб эса лойиҳани бошқа соҳаларга ҳам босқичма-босқич жорий этиш белгиланди.

Азимбой Турғунов, 
Адлия вазирлиги масъул ходими

 

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг