Бир гуруҳ ОАВ вакиллари иштирокида “Микрокредитбанк” томонидан молиялаштирилган Тошкент вилоятидаги "Умид" МЧЖга пресс-тур ташкил этилди.

Ҳозирги кунда мамлакатимизда паррандачилик соҳасига катта эътибор қаратилмоқда. Чунки бу тармоқ аҳолини озиқ-овқат маҳсулотлари билан таъминлашда муҳим аҳамият касб этади ва қишлоқ жойларда иш ўринларини яратишга ҳисса қўшади.

Президентнинг 2025 йил 30 январдаги қарорига мувофиқ, паррандачилик соҳасида аҳоли хонадонлари билан кооперация асосида ишлаш тизимини молиялаштириш учун Тикланиш ва тараққиёт жамғармасининг 50 миллион АҚШ доллари миқдоридаги маблағлари “Микрокредитбанк” АТБнинг устав капиталини оширишга йўналтирилган. Бу маблағлар ҳисобига республика бўйлаб гўшт ва тухум йўналишида кооперация тизими асосида 1 миллион нафар аҳолини иш билан таъминлашга қаратилган "Парранда боқиш — даромад топиш" лойиҳаси амалга оширилади.

Лойиҳа доирасида кам қувватда ишлаётган корхоналарни молиявий соғломлаштириш, тижорат банклари балансидаги хўжаликларни йирик корхоналарга бириктириш, ишлаб чиқариш ва қайта ишлаш тармоқлари ўртасида кооперация тизимини шакллантириш ҳамда янги лойиҳаларни амалга ошириш режалаштирилган.

Шу муносабат билан "Микрокредитбанк" АТБ томонидан молиялаштирилган Тошкент вилоятидаги "Умид" МЧЖ фаолиятини кенг ёритиш мақсадида пресс-тур ташкил этилди. Унда иштирокчилар корхонада паррандачилик маҳсулотлари ишлаб чиқариш жараёни билан яқиндан танишди.

Янгийўл туманида жойлашган ушбу корхонада 56 та парранда боқиш бинолари мавжуд бўлиб, йиллик қуввати 7,5 миллион бош бройлерни ташкил этади. Бу ерда йилига 9 минг тонна парранда гўшти етиштирилади ва ички бозорларга етказиб берилади. Шунингдек, корхона озуқа ишлаб чиқариш қувватига эга бўлиб, йилига 12,5 минг тонна озуқа тайёрланади. Товуқ сўйиш комплекси эса соатига 4 минг бош паррандаларни қайта ишлаш имкониятига эга.

Корхонада 157 минг бош наслли парранда боқилиб, йилига 19 миллион дона инкубацион тухум ва 12 миллион бош бир кунлик бройлер жўжалар етиштирилади. Шунингдек, маҳсулотларни сақлаш учун 1,2 минг тонна сиғимга эга музлаткич мавжуд.

Корхонанинг паррандачилик фаолиятини ривожлантириш лойиҳасига "Микрокредитбанк" АТБ томонидан 75 миллиард сўм миқдорида кредит маблағлари ажратилган.

Шу билан бирга, корхона вилоятдаги паст қувватда ишлаётган паррандачилик хўжаликлари билан кооперация асосида ҳамкорликни йўлга қўймоқда. Ҳозирда корхонада 100 та янги иш ўрни яратилган.

Маълумот учун, "Микрокредитбанк" АТБ томонидан жорий йил бошидан буён тадбиркорлик субъектларининг инвестицион лойиҳаларини молиялаштириш учун 8 та лойиҳага 63 миллиард сўмдан ортиқ кредит маблағлари ажратилди. 2025 йилда мамлакатимизда 10,4 миллиард дона тухум ва 850 минг тонна тирик вазнда парранда гўшти етиштириш режалаштирилган.