Мамлакатимиз балиқчилик тармоғини тизимли ривожлантириш, соҳага замонавий инновацион технологияларни жорий этиш ҳамда ички бозорни сифатли маҳсулотлар билан таъминлаш мақсадида туб ислоҳотлар босқичи бошланди.

Ўзбекистон Республикаси Президенти Шавкат Мирзиёев томонидан имзоланган “Балиқчилик тармоғини ривожлантиришга оид қўшимча чора-тадбирлар тўғрисида”ги фармон бу борадаги ҳуқуқий ва иқтисодий ўзгаришларнинг бош омили бўлди. Марказий ҳужжатга мувофиқ, 2026–2027 йиллар мамлакатда балиқчилик соҳасини ривожлантиришнинг устувор даври этиб белгиланди.

Янги стратегиянинг бош мақсади аҳолини сифатли ва арзон оқсил маҳсулоти билан таъминлаш ҳамда экспортни оширишдир. Фармон билан мамлакатда балиқ етиштириш ҳажмини 500 минг тоннага, юқори қийматли совуқ сув балиқчилигини (форел, осётр ва бошқалар) эса 20 минг тоннага етказиш бўйича қатъий вазифа қўйилди.

Бу марраларга эришиш учун соҳага мутлақо янги бошқарув тизими кириб келмоқда. Балиқчиликни ривожлантириш маркази ҳамда уни молиявий қўллаб-қувватловчи махсус жамғарма ташкил этилади. Бу эса лойиҳаларни тўғридан-тўғри ва бюрократиясиз молиялаштириш имконини беради.

Соҳадаги энг катта коррупцион хавфлардан бири бўлган сув ҳавзаларининг ноҳақ тақсимланишига чек қўйилмоқда. 2027 йилдан бошлаб барча сув омборлари ва табиий сув ҳавзалари фақат ва фақат очиқ электрон аукционлар орқали ижарага берилади. Бу ҳар бир интилувчан тадбиркор учун тенг имконият, соғлом рақобат ва хавфсиз инвестиция муҳитини кафолатлайди.

Янги даврда давлат балиқчиларни шунчаки кузатиб турмайди, балки уларнинг харажатларига шерик бўлади. Эндиликда тадбиркорларга қуйидаги йўналишлар учун субсидиялар ва компенсациялар ажратилиши белгиланди:

• Сув ҳавзаларига ўрнатиладиган қуёш панеллари;
• Аэраторлар ва интенсив балиқ етиштириш учун ёпиқ сув айланиш тизимлари;
• Хориждан келтириладиган наслий она балиқлар импорти;
• Омухта ем ишлаб чиқариш учун замонавий ускуналар.

Ушбу чора-тадбирлар балиқ етиштириш таннархини камида 25-30 фоизга камайтириш ва йил давомида узлуксиз маҳсулот олиш имконини беради.

Балиқчилик энди шунчаки ҳавзага човоқ ташлаш эмас, бу юқори технологик илм. Шу боис, соҳа вакиллари учун қисқа муддатли профессионал ўқув курслари йўлга қўйилади. Энг эътиборлиси, жараёнга хорижий етакчи мутахассисларни жалб этиш харажатлари давлат томонидан қоплаб берилади.

Ушбу кенг кўламли ислоҳотлар занжири балиқчиликни анъанавий усуллардан воз кечиб, замонавий, рақобатбардош ва юқори даромадли саноатга айлантиришга қаратилган. Натижада бозорда маҳсулот кўпаяди, нархлар барқарорлашади ва энг муҳими минглаб янги иш ўринлари яратилади. Инвестиция киритиш ва соҳада ўз ўрнини топишни истаган тадбиркорлар учун айни муддао, фурсатни бой бермаслик керак.