Йиғилишда Шавкат Мирзиёев Қишлоқ хўжалиги вазирлигига йил якунига қадар 400 миллион долларлик лойиҳаларни бошлашни топширган. Бугунги кунда 580 та янги лойиҳа ишлаб чиқилган бўлиб, кредитлар қисқа муддатга берилиши боис уларни амалга ошириш кечикмоқда.

Шу муносабат билан вазирликка лойиҳаларни ишга тушириб, лизинг асосида сотиш ваколати берилади. Боғдорчилик агентлигига 1 майга қадар 20 миллион доллар, натижага қараб, йил якунига қадар яна 45 миллион доллар ажратилади.

Бунинг ҳисобига жорий йилда 6 та вилоятда 1,8 минг гектарда интенсив боғ ва токзорлар барпо этилиб, тадбиркорларга камида 7 йил муддатга лизингга берилади. 1 майдан боғ ва токзорлар барпо этиш учун кредитлар тадбиркорларга камида 10 йил муддатга ажратилади.

Шунингдек, йил якунига қадар хусусий сектор билан бирга жами 115 минг тоннали 17 та кичик агрологистика маркази ишга туширилади. Улар «тайёр ҳолда» 5 йиллик имтиёзли давр билан камида 10 йилга лизинг асосида сотилади.