15 июнь куни қимматбаҳо металл нархи троя унцияси учун 3 450 долларга чиқиб, апрелдаги рекордга яқинлашди ва 1 грамм учун нарх 110 доллар атрофида бўлган. Хусусан, 12 июн ҳолатига олтин нархи  ўтган йилга нисбатан қарийб 30 фоизга ошган.

Қайд этилишича, Эрон ва Исроил ўртасидаги можоралар фонида инвесторлар томонидан олтинга хавфсиз актив сифатида талаб ортмоқда.

«Бошқа ҳеч бир йирик активда бундай юқори ўсиш кузатилмаган (пастдаги графикка қаранг). Ҳатто баъзилар томонидан «янги олтин» сифатида эътироф этиладиган биткоин ҳам олтинга нисбатан пастроқ нарх ўсишига эришган. Доллар эса бу даврда 10 фоиз атрофида қадрсизланган», – деб ёзади иқтисодчи Миркомил Холбоев.

Маълум қилинишича, сўнгги йилларда Марказий банклар ҳам  кўпроқ олтин сотиб олмоқда. Хусусан, сўнгги уч йилда Марказий банкларнинг соф олтин хариди 1000 тоннадан ошган.

«Бу ҳолат айниқса, Россия-Украина уруши натижасида Россия Марказий банки захираларига қўйилган чекловлардан кейин жиддийлашган. Хусусан, кўплаб ривожланаётган давлатлар (айниқса Хитой) Марказий банкларда айни Россия-Украина ўртасидаги урушдан кейин олтинга бўлган ишонч  ошди. Марказий банк олтин харидларининг асосий қисми ҳам айнан ривожланаётган давлатларга тўғри келади», – деб ёзади Холбоев. 

Иқтисодчи, шунингдек, Яқин шарқдаги кескинлик олтинга бўлган талабни яна ошириб яқин келажакда унинг нархи нисбатан юқори сақланиб қолишига олиб келишини тахмин қилади.

«Мамлакатимиз захираларида эса тарихан олтиннинг улуши жудаям юқори бўлган ва ҳозирги кунда захираларнинг 76 фоизи олтин ҳиссасига тўғри келади. Йил бошидан буён олтин нархининг ўртача 26 фоизга ўсиши захираларимизнинг 8,5 млрд долларга ўсишига замин яратди. Шунингдек, олтин энг йирик экспорт товаримиз ҳам ҳисобланади, ноаниқликлар натижасида олтин нархи ўсиши экспортимизнинг нисбатан юқори ўсишига ҳам замин яратади. Хусусан, жорий йилнинг 4 ойида олтин экспорти 5,6 млрд долларни ташкил этиб, 62 фоизга ўсган, бундай юқори ўсиш ҳам айнан юқори олтин нархи билан изоҳланади», – дейди Миркомил Холбоев.