Ўзбекистон Хотин-қизлар қўмитаси, Қорақалпоғистон Республикаси, вилоятлар ва Тошкент шаҳар ҳокимлиги ҳамкорлигида «Бизнинг жамиятда ҳар бир аёл давлат ҳимоясидадир!» шиори остида анжуман ўтказилди.

Хотин-қизлар қўмитаси томонидан «Бизнинг жамиятда ҳар бир аёл давлат ҳимоясидадир!» шиори остида вилоятлардан иш қидириб Тошкент шаҳрига келган хотин-қизларни бандлигини таъминлаш, уларнинг муаммоларини ҳал этиш мақсадида «Қўйлиқ» ва «Чорсу» бозорлари атрофидаги норасмий ёлланма ишчилар тўпланган жойларда бир марталик иш қидириб чиққан хотин-қизлар ўртасида ўрганишлар ўтказилмоқда.

Анжуманда таъкидланишича, шу кунгача 150 нафар хотин-қизлар билан мулоқотлар уюштирилган, уларнинг яшаш жойлари бўлган Андижон, Бухоро, Наманган, Самарқанд, Сурхондарё ва Фарғона вилоятларидан Тошкент шаҳрига келишларининг сабаблари аниқланиб, Тошкент шаҳрига иш излаб келган хотин-қизлар давлатимиз томонидан яратилаётган имкониятлардан, хусусан тадбиркорлик билан шуғулланиш, имтиёзли кредитлар ва томорқа хўжаликларидан мақсадли фойдаланиш, бандликни таъминлаш каби соҳаларда белгиланган имтиёзлардан хабардор эмаслиги маълум бўлган.

Хотин-қизлар қўмитаси томонидан мутасадди ташкилотлар билан биргаликда мазкур соҳадаги чора-тадбирларни изчил амалга ошириш мақсадида, барча вилоятлардаги норасмий ёлланма ишчилар тўпланган жойларда иш излаб келаётган хотин-қизлар билан мулоқотлар ўтказиш, уларнинг муаммоларини аниқлаш ва бартараф этиш бўйича чора-тадбирларни тизимли давом эттириш, жойларда хотин-қизлар ўртасида тадбиркорлик билан шуғулланиш, имтиёзли кредитлар ва томорқа хўжаликларидан мақсадли фойдаланиш каби соҳаларда белгиланган имтиёзлар ҳақида тарғибот ишларини кучайтириш режалаштирилган.