Россияда ота-она қарамоғисиз қолган яна 16 нафар бола Ўзбекистонга қайтарилди, бу ҳақда Ижтимоий ҳимоя миллий агентлиги хабар берди.

Хабарга кўра, бугун, 5 апрел куни тонгида мамлакатимизнинг 16 нафар вояга етмаган фуқароси Россиянинг Санкт Петербург шаҳридан Ўзбекистон ички ишлар ва соғлиқни сақлаш вазирликлари ходимлари ҳамроҳлигида ватанга қайтарилган.

Санкт Петербург ва Москвадаги Ўзбекистон консуллик идоралари болаларни давлат фуқароси сифатида идентификация қилиш ва уларга қайтиш сертификатларини расмийлаштириш бўйича барча чораларни кўрган. Болалар Тошкент шаҳар ИИББ қошидаги Вояга етмаганларга ижтимоий-ҳуқуқий ёрдам кўрсатиш марказига вақтинча жойлаштирилган.

Марказда уларни ота-оналари ва яқин қариндошлари «Инсон» ижтимоий хизматлар марказлари томонидан олдиндан тайёрланган васийлик ҳужжатлари билан кутиб олишди. Вояга етмаганларга ижтимоий ёрдам уларнинг кейинги яшаш жойларида ҳам давом эттирилади, дейилади хабарда.

Олиб келинган 16 нафар боланинг 11 нафари ота-оналарига, қолганлари васийлик асосида қариндошларига топширилган.