Бухорода қарзини тўламаслик учун қотиллик содир этган шахсга суд ҳукми ўқилди.

Жиноят ишлари бўйича Ромитан туман суди раиси Зафар Шароповнинг «Xabar.uz»га маълум қилишича, Бухоро туманилик 44 ёшли фуқаро Н.Э. ушбу қотилликни қасддан ва шафқатсизларча содир этган.

Қотиллик 2024 йил 22 октябрь куни, соат 18:00 ларда Бухоро тумани, Янгиобод МФЙ «Ҳазратбобо» қишлоғида жойлашган «Равшанбобо» фермер хўжалигига қарашли чорбоғда фуқаро Н.Э. томонидан содир этилган.  Маълум бўлишича, у болаликдан бирга ўсган ҳамқишлоғи О.О. билан унга тегишли узумзордаги ҳосилни 2018 йилда 10 минг АҚШ доллари эвазига сотиб олишга келишган. Ҳосилни олиб кетишдан олдин ушбу маблағларни бир йил давомида бўлаб-бўлаб тўлаб боришини айтган. Ҳамқишлоғининг ҳосилидан кўрган фойдасини ўз манфаатлари йўлида ишлатиб юбориб,  2 йил давомида 2000 АҚШ доллар пулни зўрға тўлаб берган.

Бироқ, орадан 7 йилдан ортиқ вақт ўтишига қарамай, Н.Э. ҳамқишлоғи О.О.га қайтариши керак қарзларнинг қолган қисмини, яъни 8 минг АҚШ долларини қайтаришни пайсалга солиб келаверган.

2014 йилнинг октябр ойида О.О. фермер хўжалик ерларида қўйларни боқиб, қўлидаги болта ёрдамида ўтин майдалаб турган Н.Э.дан қарзини қайтаришини сўраб келган.

Аввалига гап талашишган, кейин тортишишган. Тортишув жанжалга, жанжал эса ўзаро муштлашувга айланиб кетган.

Н.Э. тамагирлик ниятида қарзидан қутилиш мақсадида О.О.ни қасддан ўлдириш пайига тушган. Муштлашув чоғида қўлидаги болта билан О.О.нинг бош қисмининг пешана ва энса соҳаларига ўта шавфқатсизлик билан бир неча маротаба урган. Унга қаттиқ азоб-уқубат етказган. Ер майдони ёнидан оқиб ўтувчи лойқа сувли ариққа итариб,  бўйнидан буғган. «Урма, тўхта!»-деб хириллаб талпинишига қарамаган. Ариқдан чиқариб, яна шафқатсизликда давом этган.  Пешона, бош ва бел қисмларига болтанинг орқа қисми билан яна бир неча марта зарб билан урган. Сўнгра қонга беланган жонсиз тана устидан туриб,  О.О.нинг  жасадини яширишга тушган.  Шу яқин атрофдаги заҳкашгача судраб бориб, белкурак ёрдамида 1 метр 30 см чуқурлик ковлаган. Жасад сиғмагач, уни яна буклаб, шафқатсиларча шу чуқурликка кўмган.

...Орадан 22 кун ўтгач, ҳуқуқни муҳофаза қилувчи орган ходимлари томонидан О.О.нинг мурдаси топилган.

Маълумот ўрнида: Суд-тиббий экспертизасининг хулосасига кўра, жасадда бош мия очиқ жароҳати, калла гумбаз суякларини ботиқли синиши, асос суякларгача бўлакланиб майдаланиб ёрилиб синиши, бош мия пардалари, бош мия ва мияча тўқимасига қон қуйилиши, энса соҳаси ва энса суяги ўнг ярмида аниқланган лат яралар ва пешона соҳасидаги қон талаш, чегараланган юзали ўтмас қаттиқ жисмлар таъсиридан яъни болтанинг орқа темир тўмтоқ қисми билан ҳамда чап чакка тепа соҳаси, чап чакка ўрта қисми ва ўнг чап чакка тепа ўрта қисмларидаги чопилган яралари ўткир чопувчи жисм болта таъсиридан юзага келгани, яъни ҳаёт учун хавфли бўлган ва айни ҳолатда қисқа вақт оралиғида келиб чиққан унинг ўлими билан якунланган оғир тан жароҳатлари аниқланган.

Айбдор Ўзбекистон Республикаси ЖК 97-моддаси (Қасддан одам ўлдириш) 2-қисмининг «ж, и» бандлари билан айбли, деб топилган. 16 йил муддатга озодликдан маҳрум қилиш жазосини олган Н.Э. жазони умумий тартибли колонияларда ўташи белгиланди.