Самарқанд шаҳар 7-сон оилавий поликлиникаси шифокори Сунбула Орифхонова коронавирусга қарши вакцина қабул қилгандан сўнг ўзида кечган жараёнлар билан ўртоқлашди. 

Шифокор келтирган маълумот ва чоралар ўқувчиларимиз учун фойдали бўлади деган умиддамиз. 

Биринчи кун (6 апрель)

Апрелнинг илк кунидан аҳолини COVID-19 га қарши эмлаш бошланди. Табиийки, кўпчиликда ҳар хил саволлар туғилди: «Нега врачлар ўзи биринчи олмаяпти, қабилида». Шу сабабли, мен кутиб ўтирмай вакцина олишга қарор қилдим.

Поликлиникамизда икки хил вакцина бор. Мен олимларимизга ва давлатимизга тўлиқ ишонган ҳолда COVISHIELO (Хиндистон) вакцинасини танладим.

Бугун соат 12.30 да шу вакцинани олдим (6 апрель).

Мақсадим ковид билан касалланишни олдини олиш ва вакцина таьсирини ўзимда синаб кўриш эди. Чунки интернетда жуда кўп салбий фикрлар билдирилди. Мана энди мен ҳар куни аҳволимни кузатиб бораман ва сизлар билан ўртоқлашаман.

Вакцина олишдан олдин Тромбопол 150 таблеткасидан ичишни бошладим. Уни 14 кун давомида ичаман.

Қорним тўқ эди.

Вакцина олиш вақтида игна кирганини сездим холос.

Ҳозир соат 19.00 да умумий аҳволим яхши. Тана ҳароратим, қон босимим меъёрида.

Вакцина олгач, кечгача ишладим. Худога шукур яхшиман.

Иккинчи кун (7 апрель)

Хўш, бир сутка ичида нималар бўлди?

Кеча кечга томон соат 23.00ларда иситмам кўтарилди. Ваража ҳис қилдим. Ўлчаганимда, тана ҳароратим 38.0 °С чиқди.

1 дона Миг (Ибупрофен 400 мг) ичдим.

Эрталаб аҳволим яхши эди. Ишга бордим, беморларга ёрдам бердим. Тушдан кейин яна ваража ҳис қилдим.

Йўтал, томоқ оғриғи ва бошқа симптомлар безовта қилмаяпти.

Ҳозир соат 19.00 тана ҳароратим 37.7° С.

Умумий аҳволим яхши.

Учинчи кун (8 апрель)

Бугун эрталабдан аҳволим яхши.

Шикоятларим йўқ.

Тери ва шиллиқ пардалар оқамтир. Ўпкада везикуляр нафас. Сатурация 98%. Юрак тонлари аниқ. Пулсь 78 марта ураяпти. Қон босимим 110/70 мм симоб устунида. Қорним оғриқсиз. Иситмам йўқ. Тана ҳароратим 36,6° С.

Ҳозир ишда навбатчиман.

(Муаллифнинг Фейсбукдаги саҳифасидан олинди)