Бухоро вилояти, Шофиркон деҳқон бозори ҳудудидаги телефон савдо дўконида ўғрилик жиноятини содир этганлар қўлга олинди. 

“Xabar.uz”га вилоят ИИБ ахборот хизмати хабар беришича, ўғрилик тонг ғира-ширасида юзага келган. Орадан бир неча соат ўтар-ўтмас савдо дўконига ишга келган сотувчи дўкон эшиги қулфи бузилгани, пештахталар ва жовонлар тартибсиз ҳолатда эканига гувоҳ бўлган. Зудлик билан ички ишлар органларига хабар берган.  

Ҳолат юзасидан олиб борилган суриштирувда савдо дўконидан жами 45 миллион 110 минг сўм миқдоридаги телефон ҳамда 3 миллион сўмлик видеокузатув мосламалари талон-тарож қилингани аниқланган. Номаълум шахсларга нисбатан Ўзбекистон Республикаси жиноят кодексининг 169-моддаси (Ўғрилик), 2-қисми билан иш қўзғатилган.

“Тезкор ходимлар томонидан олиб борилган қидирув ишлари жуда тез ниҳояланди. Савдо дўконини “урган” шоввозлар шу ҳудудда яшовчи икки шахс экани аниқланди. Айни пайтда, уларнинг шу турдаги бошқа жиноятларга ҳам алоқадорлиги ўрганилиб, тергов суриштирув ишлари олиб борилмоқда”,-деди вилоят ИИБ ахборот хизмати раҳбари Шуҳрат Жалолов.