Бундан бир неча йил илгари Халқаро аҳамиятдаги А-380-«Ғузор-Бухоро-Нукус-Бейноу» автомобиль йўлининг бир қисми цементобетон қопламали қилиб қурилган бўлиб, иккинчи қатнов томони таъмирталаб аҳволда эди. 

Мазкур йўлда 2008 йилдан йўлсозлаш ишлари бошланган бўлиб, 2008-2009 йилларда эса тендер масаласининг ортга сурилгани ишнинг оқсоқланиб колишига сабаб бўлган. Орадан ўн йилча вақт ўтиб, яъни 2019 йилда ушбу йўналишнинг 87 километр масофаси тендер орқали Хитой йўлқурилиш компанияси томонидан ютиб олинган.

«Бугунги кунда халқаро аҳамиятдаги ушбу А-380-«Ғузор-Бухоро-Нукус-Бейноу» автомобиль йўли жаҳон стандартларига мос сифатда хориж компанияси томонидан қурилган. Ушбу йўл Ўзбек миллий автомагистралининг таркибий қисми саналиб, у орқали Марказий ва Шарқий Европа, Россия, Украина ва Қозоғистонга чиқиш таъминланади. Ўзбекистон орқали транс-афғон транспорт йўналишига боғланади. Ушбу автомагистрал Қорақалпоғистон Республикаси, Хоразм, Бухоро ва Қашқадарё вилоятлари ҳудудидан ўтиб, давлатлараро, вилоятлараро алоқаларни таъминлашда ҳам муҳим бўғин ҳисобланади»,-деди вилоят раҳбари Ботир Зарипов мазкур автомагистралда олиб борилаётган реконструкция ишлари билан танишиб, ишларни янада жадаллаштириш юзасидан масъулларга топшириқ ва кўрсатмалар берар экан.

Ушбу автомагистрал ўз навбатида халқаро аҳамиятдаги М37 «Самарқанд—Бухоро—Туркманбоши» ва М39 «Алмата—Бешкек—Тошкент—Термиз» автомобил йўлларини боғлайдиган муҳим халқаро йўналишларни ҳам боғлаб туради.

Яқинда мазкур автомобил йўлининг Когон шаҳри, Когон, Бухоро ва Қоровулбозор туманлари ҳудудидан ўтган қисмида «Яшил макон» умуммиллий лойиҳаси ўтказилган. Халқаро аҳамиятга эга йўлнинг икки томонида қарийб, 7 километрлик масофадаги ерлар махсус техникалар ёрдамида текисланиб, қазиш ишлари сифатли амалга оширилган. Бухоро иқлимига мос, иссиқ ва совуқ об-ҳаво шароитига чидамли манзарали дарахт кўчатлари ўтқазилган.

«Аввалги ўнқир-чўнқир, қишда лой, ёзда чанги осмонга кўтарилиб, яроқсиз ҳолдаги ушбу магистрал йўл эндиликда текис ва равон кўринишга келиб, ҳам маҳаллий, ҳам хориждан қатнаётган қўшни давлатлар вакилларининг кайфиятини кўтаради»,-деди Ботир Зарипов.