Коронавирус инфекцияси билан касалланган беморларга сифатли тиббий ёрдам кўрсатиш, касаллик тарқалишининг олдини олиш бўйича тиббиёт ходимларини ўқитиш ва касбий малакасини ошириш ишларини янада такомиллаштириш мақсадида яна бир янги лойиҳага қўл урилди. Бу ҳақда ССВ хабар берди.

Юртимиздаги тиббиёт олий ўқув юртлари ва даволаш муассасаларининг тажрибали реаниматолог, терапевт-пульмонолог, педиатр ва бошқа мутахассислари саралаб олиниб, улар COVID-19ни даволаш муассасаларига жалб этилган шифокорларни коронавирус бўйича тўпланган миллий тажриба ва дунё олимларининг охирги изланишлари натижасида аниқланган сўнгги маълумотлар асосида қайта тайёрлаш ва коронавирусга қарши курашиш бўйича қўлланманинг янгиланган шаклини жойларда тизимли ўқитиш бўйича тренерликка сафарбар қилинмоқда.

Бундан кўзланган мақсад коронавирус ўчоғида иш олиб борадиган мутахассисларни беморлар билан ишлашга максимал даражада тайёрлаш, шу орқали касалликни жиловлашда ва беморларнинг соғайиш кўрсаткичларини янада яхшилашда ижобий натижага эришишдир.

Бугун Соғлиқни сақлаш вазири Алишер Шодмонов Тошкент тиббиёт академияси, Тошкент педиатрия тиббиёт институти, Тошкент стоматология давлат институти, Тиббиёт ходимларининг касбий малакасини ривожлантириш маркази ва даволаш муассасаларининг профессор-ўқитувчилари ҳамда мутахассислари орасидан саралаб олинган шундай тренерлар билан учрашув ўтказди. Мулоқотда вазир уларга тегишли кўрсатма ва тавсияларини билдирди.

Вазирликнинг тегишли буйруғига кўра, мамлакатимизнинг ҳар бир ҳудудига 12 нафардан турли йўналишдаги тиббиёт мутахассислари сафарбар қилинади. Уларга қўшимча равишда ҳудудлардаги тиббиёт олий ўқув юртлари профессор-ўқитувчилари бириктирилади. Улар коронавирусни даволаш муассасаларида фаолият кўрсатаётган ва у ерда иш бошламоқчи бўлган шифокорларни янгича модул ўқув дастури асосида ўқитади, билим-кўникмаларини оширади, даволаш жараёнларида ҳам бевосита иштирок этади.

Ўқув дастурини ижобий ўзлаштирган шифокорларга тегишли сертификатлар берилиб, даволаш муассасаларига иш бошлаш учун юборилади.