Швециялик етакчи вирусолог Андерс Тегнелл ҳатто бир кун ичида коронавирус туфайли касалланиш ва ўлим ҳолати сезиларли камайган бўлса-да, карантиндан бош тортиш тўғри йўл бўлганига унчалик ишончи комил эмаслигини тан олди. Бу ҳақда «Daily Mail» хабар берди.

Айнан Тегнелл мамлакатда одатий ҳаёт тарзини давом эттириш ва қатъий чоралардан бош тортиш тарафдорларидан бири саналади. Пандемия эълон қилинишига қарамай, Швецияда мактаблар, ресторан ва барлар фаолиятини давом эттирмоқда.

«Энг муҳими, ўзимизда мавжуд билим ва воситалардан имкон қадар фойдаланиш керак, деб ҳисоблайман. Ҳамиша камтар бўлиш зарур, чунки ўз фикрингизни ўзгартиришга тўғри келиб қолиши мумкин», — деди эксперт.

1 май куни Швецияда 428 киши коронавирусга чалинди, 67 киши вафот этди. 30 апрель куни эса 790 та касалланиш ҳолат қайд этилиб, 124 киши ҳаётдан кўз юмганди.

Коронавирус тарқалишига қарши курашнинг шведча модели кўпгина баҳс-мунозараларга сабаб бўлмоқда. Унинг ўзига хослиги карантин ва ташкилотларни вақтинча ёпишдан бош тортиш ҳисобланади. АҚШ президенти Дональд Трамп: «Швеция бу қароридан қаттиқ пушаймон бўлади», дея танқид қилганди.

Шунга қарамай, Жаҳон Соғлиқни Сақлаш Ташкилотининг фикрича, карантин бекор қилингандан сўнг Швеция нормал ҳаёт намунасига айланиши мумкин.

Маълумларга кўра, Швецияда 22 минг киши коронавирусни юқтирган. Пандемия оқибатида жами 2,6 минг киши оламдан ўтди.