Жорий йилда ОТМларга қабул қилиш бўйича имтиҳонлар «аввал тест, сўнг танлов» тамойилига мувофиқ бир вақтда ўтказилиши белгиланган.

Мазкур тартиб жорий йил 24 майда қабул қилинган Президентнинг ПФ-81-сон фармони билан амалиётга жорий қилинмоқда.

Билим ва малакаларни баҳолаш агентлиги директори маслаҳатчиси Зоҳид Шакаровнинг маълум қилишича, бунда абитуриентлар ўз танловига кўра тест синови натижасида тўплаган балидан келиб чиқиб:

• дастлаб олий таълимнинг бакалавриат таълим йўналишларига;
• сўнг профессионал таълим муассасаларига ўқишга кириш учун танловда иштирок этади.
• Ўқишга қабул қилиш бўйича кириш имтиҳонлари июл-август ойларида ўтказилади.

Давлат олий таълим муассасалари бакалавриатига қабул жараёни икки босқичда амалга оширилади.

Биринчи босқичда абитуриентлар ҳар йили 5-июндан 25-июнга қадар (25-июн куни ҳам) тест синови топшириш учун Агентликнинг my.uzbmb.uz сайтида онлайн рўйхатдан ўтади ҳамда қуйидагиларни танлайди:

Фақат тест синовида иштирок этса:

• фанлар мажмуаси;
• таълим тили;
• тест топшириш ҳудуди.

Алоҳида иқтидор талаб этиладиган таълим йўналишларида ўқиш истагини билдирса (касбий (ижодий) имтиҳон) топширса:

• таълим тили;
• тест топшириш ҳудуди;
• алоҳида иқтидор талаб этиладиган таълим йўналиши;
• касбий (ижодий) имтиҳонни топшириладиган давлат олий таълим муассасаси.

Иккинчи босқичда абитуриентлар тест синовлари тўлиқ якунланганидан сўнг 15 кун давомида Агентликнинг my.uzbmb.uz сайтида орқали қуйидагиларни танлайди:

• олий таълим муассасаси;
• бакалавриат таълим йўналиши;
• таълим шакли;
• танлов устуворлиги.

Абитуриентнинг тест синовида тўплаган баллари тест синови ўтказилган куннинг эртасига, унинг талабаликка тавсия этилгани ёки этилмагани бўйича танлов натижаси қабул жараёнининг иккинчи босқичи тўлиқ якунлангандан кейин бир ҳафта муддатда Агентликнинг расмий веб-сайтида эълон қилинади.

Коллеж ва техникумларда ўқиш истагини билдирган абитуриентлар «аввал тест, сўнг танлов» тамойилига мувофиқ олий таълим муассасаларига қабулнинг якуний натижаси эълон қилинганидан сўнг 10 кун муддатда қуйидагиларни танлайди:

• коллеж ва (ёки) техникум;
• касб ва мутахассислик;
• таълим шакли.

Коллеж ва техникумлар учун якуний танлов натижаси бир ҳафта муддатда Агентликнинг расмий веб-сайтида эълон қилинади.

Шунингдек, абитуриентлар ва уларнинг ота-оналарига қулайликлар яратиш мақсадида Агентлик томонидан ҳафтанинг сешанба ва жума кунлари мутахассислар иштирокида 2024-2025-ўқув йили қабулига оид масалалар юзасидан овозли ва видеочатлар ташкил этилади.

Бундан ташқари барча фуқароларимиз Агентликнинг 1195 ишонч телефонига мурожаат қилган ҳолда ўзларини қизиқтирган саволларга жавоб олишлари мумкин.