Сенатнинг ваколатлари янги таҳрирдаги Конституцияга мувофиқлаштирилмоқда. Бу борада Парламентга «Ўзбекистон Республикасининг айрим қонун хужжатларига ўзгартириш ва қўшимчалар киритиш тўғрисида»ги қонун лойиҳаси киритилган.

Ҳужжат лойиҳасига кўра, Сенатга:

• маҳаллий давлат ҳокимияти вакиллик органларига ўз фаолиятини амалга оширишда кўмаклашиш;
• Қонунчилик палатаси тарқатиб юборилган даврда Олий Мажлиснинг қонунларни қабул қилишга доир ваколатларини бажариш;
• қонунни у Сенатга келиб тушган кундан эътиборан 60 кун ичида кўриб чиқиш ва бошқа ваколатлар берилмоқда.

Ўз навбатида, Сенатнинг айрим ваколатлари бекор қилиниб, Қонунчилик палатасининг мутлақ ваколатлари сифатида белгиланмоқда. Яъни:

• Давлат бюджетининг ижро этилиши устидан назоратни амалга ошириш;
• Ҳисоб палатасининг ҳисоботини кўриб чиқиш;
• Президентнинг тақдимига биноан Бош вазир номзодини кўриб чиқиш ва маъқуллаш;
• Бош вазир, Ҳукумат аъзоларининг ҳисоботларини ҳамда Вазирлар Маҳкамасининг ҳар йилги маърузасини эшитиш.

Шунингдек, Сенат аъзолари ҳар бир маъмурий-ҳудудий бирликдан 4 нафардан (амалда 6 киши) сайланиши, 9 нафари (амалда 16 киши) Президент томонидан тайинланиши (жами 65 нафар) белгиланмоқда. Доимий асосда ишловчи сенаторлар сони эса  амалдагидек 25 нафар миқдорда сақланиб қолмоқда.

Қонунчилик палатаси Спикери ўринбосарлари сони эса 7 тадан 2 тага қисқартириляпти. Бунда Спикернинг ўринбосарлари фракция аъзоси бўлиши мумкин эмаслиги ҳамда лавозимда бўлиш даврида сиёсий партиядаги аъзоликни тўхтатиб туриши белгиланмоқда.

Фракция раҳбари моддий, тиббий ва транспорт хизмати кўрсатиш шарт-шароитларига кўра Спикер ўринбосарига тенглаштирилмоқда.