2025 йилнинг январь ойида дунё давлатларининг Марказий банклари 18 тонна соф олтин харидларини амалга оширган.

Жаҳон олтин кенгаши ҳисоботида қайд этилишича, бунда ривожланаётган бозорлар марказий банклари соф харидлар бўйича етакчи ўринни эгаллаб туришибди ва Ўзбекистон, Хитой ҳамда Қозоғистон харидорлар ичида биринчи учликни банд қилган.

Ўзбекистон Марказий банки январь ойида 8 тонна соф харидни қайд этган ва ўз захираларини 391 тоннага етказган. Ёки қимматбаҳо металлнинг халқаро захиралардаги улуши 82 фоизни ташкил этган.

Шу тариқа, Хитой Халқ банки январь ойида 5 тонна (умумий захираси 2 285 тонна) ва Қозоғистон Миллий банки эса 4 тонна (умумий захираси 288 тонна) олтин сотиб олган.

Шунингдек, ҳисобот даврида Польша Миллий банки (3 тонна), Ҳиндистон захира банки (3 тонна), Чехия миллий банки (2 тонна) ва Қатар Марказий банки (1 тонна) ҳам энг кўп олтин харид қилган регуляторлар сафида санаб ўтилади.

Ойнинг машҳур сотувчилари эса Россия Марказий банки (3 тонна), Иордания Марказий банки (3 тонна) ва Қирғизистон Республикаси Миллий банки (2 тонна) бўлган.