Лотереяда 1 млн фунт стерлинг (тахминан 1,34 млн АҚШ доллари) ютган британиялик Адам Лопес икки ой узлуксиз давом этган базмлардан сўнг шифохонага тушди. Бу ҳақда BBC хабар берди.

39 ёшли Лопес июл ойида бир кунда миллионерга айланди — сотиб олган лотерея чиптасига нақ 1 млн фунт стерлинг ютуқ чиқди. Ютуқдан ўзини қўйгани жой топа олмаган эркак дарҳол ишдан бўшаб, ғалабани қизғин нишонлашга киришди. Орадан икки ой ўтгач, унинг соғлиғи кескин ёмонлашди. 10 сентябр у икки томонлама ўпка артерияси тромбоэмболияси билан шифохонага ётқизилди.

«Нафасим қисиб, юролмай қолдим. Тез ёрдам чақирдим, мени уйимдан олиб кетишди, ҳаётимни ўзгартирган энг катта воқеа — тез ёрдам машинасининг орқа ўриндиғида ётганимда сирена овозидан ўзимга келишим бўлди. Тез ёрдам машинасида сени бир аҳволда олиб кетишаётганида 1 миллион, 100 миллион, миллиард, триллион пулинг бор-йўқлиги аҳамиятсиз, булар кўзингга кўринмайди», — деди Лопес.

Лопес саккиз кун шифохонада даволанди. Унинг айтишича, бўлиб ўтган воқеа ҳаётдаги муҳим нарсалар ҳақидаги қарашларини ўзгартиришга ундади.