«Барселона» футбол клуби молиявий фирибгарликда гумон қилиняпти — каталонияликлар устидан прокуратура иш очди. Bolavip хабарига кўра, Испаниянинг номдор жамоаси ҳакамларни сотиб олишда айбланмоқда.

ОАВ «Барселона» ва Испания қироллик футбол федерациясининг ҳакамлар қўмитаси собиқ раҳбари Хосе Мария Энрикес Негрейро ўртасидаги алоқадорликни топди. Айтилишича, 2016–2018 йиллар давомида Каталония жамоаси унга қарашли DASNIL 95 компаниясига 1,4 млн евро ўтказиб берган.

Агарда прокуратура «Барселона»нинг шу молиявий хатти-ҳаракатларида ноқонунийлик аломатларини аниқласа, жазо муқаррар. Манбага кўра, бу чемпионат турнир жадвалида очколардан маҳрум этишдан тортиб (худди Италиядаги «Ювентус» сингари), ҳатто Ла Лигадан четлатишгача бориши мумкин.

Айни пайтда Ла Лигада «Барселона» энг яқин таъқибчиси «Реал Мадрид»ни 8 очкога ортда қолдириб, якка пешқадам бўлиб турибди.

Маълумот учун: «Барселона» ўз тарихида Ла Лигадан тушиб кетмаган уч клуб («Реал Мадрид» ва «Атлетик» Билбао билан бирга)дан бири ҳисобланади.

Бугун оқшом Европа лигаси 1/16 финали доирасида «Барселона» ўз майдонида «Манчестер Юнайтед»ни қабул қилади. Ўзбекистон вақти билан соат 22:45 да бошланадиган ўйинни «Спорт» телеканали жонли намойиш этади. Ўтказиб юборманг!